|
oVirt conta con casos de éxito en diversos ámbitos, na páxina web do proxecto pode verse unha mostra dos mesmos. O caso que dende Mancomún se destaca este mes é o da Universidade de Sevilla a cal conta con arredor de 60.000 estudantes e na que utilizaban solucións privativas para contar con escritorios virtuais para os estudantado resultándolles esta excesivamente cara.
No curso académico de 2011/12 estrearon unha nova plataforma de virtualización baseada en oVirt implementada pola empresa Virtual Cable. A migración a esta infraestrutura comezou cun piloto de 180 escritorios co que se demostrou a solvencia tecnolóxica do proxecto que actualmente utilizan máis de 3.000 estudantes accedendo tanto internamente dende a universidade coma dende fora dela.
|
|
oVirt é unha plataforma de virtualización libre mediante a cal se pode xestionar por completo a infraestrutura de virtualización dunha organización. O proxecto foi iniciado por Red Hat e inclúe todas as pezas necesarias para a virtualización, dende o hipervisor ata a interface de xestión do centro de datos podendo realizar a xestión da infraestrutura conformada polos proxectos libres KVM, Gluster, PatternFly e Ansible.
Entre as funcionalidades de oVirt máis destacadas están a de ter unha interface web de administración mediante a cal se poden xestionar e configurara a rede, o almacenamento e as máquinas que conformen o centro de datos. Permite a migración de máquinas e discos virtuais entre máquinas físicas sen apagalas e permite a alta dispoñibilidade de máquinas.
Con todo isto oVirt é unha alternativa libre a outras plataformas de xestión de infraestrutura virtual como pode ser vmware tendo a unha empresa como Red Hat detrás.
|
