Ferramentas empresariais

Nova sección en Mancomún: Ferramentas empresariais

Pequenos videotitoriais, de 3 minutos de duración, para mostrar ferramentas de software libre que podemos usar nas empresas.

Pílula sobre OpenVAS, avaliación de vulnerabilidades

OpenVAS (Open Vulnerability Assessment System) é un software que se centra na avaliación de vulnerabilidades dun sistema informático. Con OpenVAS poden lanzarse diversos tipos de probas sobre distintos obxectos de forma manual ou programada, configurando periodicidades. Estas probas analizan todas as vulnerabilidades descubertas recibindo actualizacións das mesmas diariamente.

A solución libre completa integra os seguintes compoñentes:
– OpenVAS scanner – O compoñente que realiza as probas e escaneos de vulnerabilidades.
– Greenbone Vulnerability Management (GVM) – Peza intermedia entre OpenVAS e a interface web que xestiona a configuración e os resultados dos escaneos.
– Greenbone Security Assistant (GSA) – Unha interface web escrita en React a través da cal se poden consultar, programar e visualizar os informes de vulnerabilidades.

Alfresco, xestor de contidos empresarial

Alfresco é unha solución completa para a xestión documental empresarial, coa que poderemos automatizar a captura, a xestión, o almacenamento e a preservación de contidos e documentos dixitais relacionados cos procesos da organización.

Un sistema de administración de contidos pensado para empresas de calquera tamaño, de software libre, baseado en estándares abertos, desenvolto en Java e multiplataforma (compatible con Windows, Unix Solaris e varias versións GNU/Linux).

Alfresco permite axilizar os fluxos de traballo, mellorando os seguintes puntos:
– Organización e consolidación do contido para a mellora da produtividade e mantendo o control da información corporativa que achegue valor.
– Compartir a información coas persoas de dentro e fóra da organización, incluídos os socios e clientes.
– Favorecer o cumprimento de normativas coa xestión documental integrada.
– Automatizando e optimizando os procesos empresariais críticos, como a tramitación de facturas e as aprobacións de gastos.

CiviCRM, xestión das relacións entre contactos do Terceiro Sector

CiviCRM é un software pensado para o manexo das relacións entre contactos (CRM), de software libre e gratuíto, centrado nas necesidades das organizacións sen fins de lucro e do terceiro sector.

Permite a unha organización rexistrar e administrar a información acerca das diversas persoas e organizacións coas que interactúa.

CiviCRM está deseñado especialmente para:
– ONG
– Asociacións
– Fundacións
– Partidos políticos
– Organismos con socios e contribuidores
– Entidades sen ánimo de lucro
– Campañas benéficas
– Captación de socios e de fondos

Contactos

Permite crear e xestionar todos os contactos da organización, rexistrando todas as actividades relacionadas cos mesmos:
– Poderemos rexistrar a información básica de contacto como nome, dirección, correo electrónico e número de teléfono.
– Definir as relacións entre os nosos contactos.
– Poderemos rexistrar todas as comunicacións entre a organización e a nosa base social.
– Realizar envíos masivos de correos electrónicos a toda a base de contactos.
– Incluír / excluír grupos de contactos nos envíos.
– Xestionar as contribucións, donativos, cotas de socio, entradas a eventos.
– CiviCRM integra por defecto varias pasarelas de pago que permiten realizar o cobro online das contribucións, e xestionar outro tipo de membresías.

Eventos

Co módulo de xestión de eventos poderemos:
– Organizar un evento e crear unha páxina de inscrición online
– Xestionar a voluntarios e outros recursos
– Informes a medida

Pílula sobre PrestaShop, o teu negocio en liña

PrestaShop é unha plataforma de comercio electrónico completa, de software libre, innovadora e eficaz que che permitirá crear a túa tenda en liña e ter o teu negocio na internet.

Con PrestaShop poderemos:
– Elixir un deseño e logo personalizado para a nosa tenda en liña.
– Engadir produtos ao catálogo. PrestaShop ten todo o que necesitas para organizar o teu inventario de produtos e servizos.
– Configurar as formas de pago: Visa, Mastercard, PayPal…, e deixar que os teus usuarios elixan a forma de pago que máis lle conveña.
– Xestionar os pedidos en tempo real, acceder aos datos de envío, editar a factura automaticamente e elixir a empresa coa que se farán os envíos: Correos, Seur, DHL…
– Integrar a tenda no teu propio dominio.
– Disporemos de ferramentas de márketing para aumentar as vendas. Módulos que che permitirán crear códigos promocionais, ofertas de produtos, blogue e todo o necesario para que a túa tenda sexa todo un éxito.
– Configurar a tenda en varios idiomas e moedas dunha forma sinxela.
– Aumentar as vendas engadindo funcionalidades con máis de 3.000 módulos. Poderemos personalizar a tenda en liña, incrementar o tráfico, mellorar as conversións e fidelizar aos clientes.
– Analizar os resultados.

Pílula sobre Rocket.chat, centro de comunicacións

Con Rocket.chat poderemos controlar as nosas comunicacións, xestionar os nosos datos e ter a nosa propia plataforma de colaboración para mellorar a produtividade do noso equipo. Rocket.Chat é escalable, gratuíto e software libre, que pode substituír o correo electrónico e mellorar os nosos fluxos de traballo dixital.

Con Rocket.chat poderemos comunicarnos e colaborar nos equipos, compartir arquivos, chatear en tempo real ou cambiar a videoconferencia ou audioconferencia rápidamente. Mellorar a produtividade discutindo e compartindo ideas, proxectos e arquivos co chat en equipo en tempo real ou asincrónico.

Algunhas das súas características son:
– Procuras, posibilidade de audio e videoconferencia, acceso para convidados, compartir pantalla, compartir arquivos, LiveChat, LDAP Group Sync, autenticación de dous factores (2 FA), encriptación E2E, SSO, e ducias de provedores de Oauth.
– Utiliza un sistema de aprendizaxe automática para a tradución automática de mensaxes en tempo real entre os usuarios.
– A interface de usuario foi traducida a máis de 50 idiomas.
– Podemos empregar Rocket.chat directamente desde un navegador, dispón de aplicación de escritorio e tamén de aplicación para móbiles.
– Construído para empresas con altos estándares de seguridade, Rocket.Chat axústase aos estándares das empresas con información ultra sensible co que poderemos ter conversacións seguras.

Pílula sobre Woocommerce, comercio electrónico

Se necesitas construír un sitio web de comercio electrónico, Woocommerce é unha das plataforma máis populares do mundo, personalizable e de software libre, construída sobre WordPress.

Engadindo o plugin Woocommerce a calquera sitio de WordPress, poderemos crear unha nova tenda en poucos minutos de forma gratuíta e ter estatísticas en tempo real das ventas. Woocommerce é totalmente personalizable, co cal poderás vender desde clases de ximnasia ata coches de luxo.

Poderás engadir características e funcionalidades coas extensións oficiais de Woocommerce desde o seu Marketplace. E tamén poderás dirixir a túa tenda desde calquera lugar do planeta, coa aplicación Woocommerce Mobile para dispositivos móbiles (Android e iOS).

Con Woocomerce poderemos:
– Crea escaparates bonitos e atractivos.
– Personaliza páxinas en cuestión de minutos.
– Xestionar de maneira eficiente as túas operacións comerciais.
– Simplificar o tema dos impostos das vendas.
– Ter métricas de rendemento e un escritorio central potente.
– Dispor dunha comunidade grande e apaixonada.

En resumo, poderemos deseñar un sitio de venda en liña atractivo, profesional e que responda ás necesidades dos nosos clientes, optimizado para dispositivos móbiles e crear o escaparate perfecto para a túa marca sen necesidade de coñecementos informáticos.

Pílula sobre Zabbix, solución de monitorización de redes

Zabbix é unha ferramenta de software libre para monitorización de redes. A xestión dunha rede de ordenadores dentro dunha empresa é un dos aspectos principais a ter en conta. A conectividade e o acceso á información, son aspectos clave na organización das empresas modernas en calquera ámbito de actividade.

Zabbix permite monitorizar e rexistrar o estado de varios servizos nunha rede de ordenadores, servidores ou hardware da propia rede interna dunha organización.

Entre as súas características destacan:
– Colección intelixente e altamente automatizada de métricas
– Descubrimento automático
– Detección avanzada de problemas
– Verificación da dispoñibilidade e nivel de resposta de varios servizos como por exemplo servizos web ou de correo.
– Estatísticas como carga da CPU, uso de disco, ancho de banda da rede…
– Permite monitorizar servizos a través de diferentes protocolos.
– Zabbix está dispoñible baixo a licenza de software Libre GPL.
– Predición de tendencias

Podemos descargalo libremente desde a web oficial, e instalalo no servidor da nosa empresa. Tamén podemos probar Zabbix a través do CDTIC Virtual, sen necesidade de instalar nada.

Videotitorial sobre Facturascripts

FacturaScripts, é un programa sinxelo de utilizar, e ao mesmo tempo, accesible e potente, que permite levar a contabilidade da túa empresa sen esforzo. Pensado especialmente para PEMES, autónomos e asociacións.

Tamén é un excelente programa para facer orzamentos e permite, cun par de clics, convertelos en pedidos, albarás ou facturas, co que aforra tempo de xestión. Conta tamén coa posibilidade da xestión do catálogo de produtos e a xeración automática de asentos contables, ademais dun extenso catálogo de plugins e actualizacións periódicas froito da activa comunidade arredor do proxecto.

Debido a que é accesible mediante unha web, os usuarios terán acceso aos datos, así como plena capacidade de xestión dende calquera dispositivo con acceso a Internet e un navegador web.