- Publicada a 1º edición do libro Comezar con Ubuntu 10.04 LTS en lingua galega.
- A obra é o resultado da colaboración entre a sociedade civil e distintas institucións pública co obxectivo común de fornecer documentación de calidade e en galego para o achegamento ás TIC.
- A obra está dispoñible para a súa descarga na internet, na web Comezar con Ubuntu, guía para principiantes do sistema operativo Ubuntu.
Onte reuníronse no Salón de Actos da Casa de Cultura do Concello de Dodro os promotores da primeira edición do manual de Ubuntu en lingua galega.
Tanto don José Andrés Freire, en representación da área TIC da USC, como dona Vitoria Rei Mariño, tenenta de alcalde de Dodro e anfitrioa, salientaron a súa satisfacción por ver o produto xa publicado e dispoñible para a súa distribución e uso por todo tipo de público. Así mesmo agradeceron o financiamento obtido da Deputación da Coruña, da Secretaría Xeral de Política
Lingüística e da Secretaría Xeral de Modernización e Innovación Tecnolóxica. A continuación interveu tamén don Miguel Branco Vázquez como presidente da AC Proxecto Trasno que fixo fincapé no interese de dar continuidade a este tipo de iniciativas en que, polo interese xeral colaboran tanto a Administración como entes cívicos. Remataron a quenda de intervencións os responsables dos servizos técnicos do Concello de Dodro e da Oficina de Software Libre da USC implicados, así como don Miguel Bouzada como representante dos tradutores voluntarios.
A obra «Comezar con Ubuntu 10.04», que agora sae editada en papel, é unha guía para principiantes do sistema operativo Ubuntu, que lles axudará a familiarizarse coas tarefas diarias deste potente sistema: navegar polo web, escoitar música ou escanear documentos.
O contido do manual pon énfase na sinxeleza ao seguir as instrucións e é axeitado para todos os niveis de experiencia.
Escrito cunha licenza de código aberto, o libro conta tamén con versión electrónica que é de balde para descargar, ler, modificar e compartir, dispoñible para a súa descarga dende a web Comezar con Ubuntu, guía para principiantes do sistema operativo Ubuntu.
Este manual é tradución ao galego, revisión técnica e de redacción do proxecto orixinal, Getting Started with Ubuntu 10.04, que consiste nun proxecto de código aberto, desenvolvido pola comunidade internacional de voluntarios, para crear e manter documentación de calidade para Ubuntu e os seus derivados, de maneira que se contribúa a baixar a barreira de entrada de Linux para os novos usuarios.
Comezar con Ubuntu 10.04 é un proxecto de colaboración entre a Concellaría de Dodro, a Oficina de Software Libre da Universidade de Santiago de Compostela e a AC Proxecto Trasno, que forneceron o persoal técnico tanto lingüístico como informático e que chega ao soporte en papel financiado pola Deputación da Coruña e a Xunta de Galicia, e que xa ten asegurado unha nova reimpresión ao abeiro do convenio de colaboración das asociacións galegas de usuarios de software libre coa Fundación para o Fomento da Calidade Industrial e o Desenvolvemento Tecnolóxico de Galicia por encomenda da Secretaría Xeral de Modernización e Innovación Tecnolóxica do cal a AC Trasno é asinante.
Constitúe esta obra unha boa mostra de colaboración entre as distintas institucións, que facilitan a asesoría técnica e lingüística así como os medios para a impresión, e a sociedade civil, que sacou adiante este proxecto de tradución tecnicamente complexo. As arredor de 5000 liñas do manual (resultado dun corpo de tradución de 9000 liñas) a penas foi traducido a un par de linguas máis.
Con este acto formal as tres entidades implicadas na edición comezarán agora a distribución das súas propias reimpresións do Manual en función das necesidades que ten cada unha e do diverso público para o que se fixo. Considérase que tanto a implantación na rede de locais socioculturais do Concello de Dodro, as aulas libres da USC así como os cursos de formación da Asociación Trasno serán os primeiros en recibir este material. Sen dúbida a implantación do programa Abalar (baseado no mesmo sistema operativo) será unha fonte de demanda importante para este tipo de materiais e así se espera que se poida seguir mantendo actualizado de cara ao futuro.
