Actualidade

Que é open source ou código aberto?

Trátase de software distribuído cunha licenza que cumpre o seguinte decálogo:

  1. Libre redistribución: o software debe poder ser distribuído ou vendido libremente.

  2. Código fonte: o software debe incluír o código fonte ou polo menos poder obtelo a un custo razoábel, preferiblemente descargábel dende Internet sen cargo.

  3. Traballos derivados: a licenza debe permitir realizar modificacións e redistribuilas coa mesma licenza do software orixinal.

  4. Integridade do código fonte do autor: a licenza podería limitar que as modificacións se distribúan só como “parches” para aplicar durante a reconstrución do programa. Podería obrigar a que levasen un nome ou número de versión diferente á do software orixinal.

  5. Non discriminación a persoas ou grupos: a licenza non debe excluír a ningunha persoa ou grupo de persoas.

  6. Non discriminación de áreas de aplicación: a licenza non debe restrinxir o uso do programa en ningunha  área. Por exemplo, non deben restrinxirse os usos comerciais do programa.

  7. Distribución da Licenza: débense aplicar os mesmos dereitos a todos aqueles a quen se lles distribúa o programa.

  8. A licenza non debe ser específica dun produto: os dereitos unidos a un programa non deben depender de que forme parte ou non dun paquete de software particular.

  9. A licenza non debe restrinxir outro software: a licenza non debe impoñer restricións sobre o software distribuído co orixinal. Por exemplo, non debe insistir en que todos os programas distribuídos xunto co propio deban ser tamén open source.

  10. A licenza debe ser tecnoloxicamente neutral: a licenza non debe impoñer o uso de ningunha tecnoloxía ou estilo de interface concreto. Así, non debe obrigar á súa aceptación por medio dun clic de rato…

Para coñecer máis, ler as seguintes referencias:

Definición de Open Source da OSI.

Definición da wikipedia.

Open Source Movies

Open Source Movies é unha Web que contén vídeos que se poden visualizar de xeito libre. Nela podemos atopar un fondo documental execelente, dende a primeira película de ciencia ficción “Le voyage dans la lune” feita polo francés George Meiles no 1902, ata vídeos da invasión francesa, por Alemania, na segunda guerra mundial.

Estrea de "Elephants Dream". Primeira película libre.

O próximo día 24 de Marzo terá lugar a estrea de “Elephants Dream”. Trátase da primeira película feita completamente empregando software libre, concretamente o software 3D Blender.

A estrea terá lugar no cine Cinema Ketelhuis, Amsterdam

A película foi realizada polo equipo Orange, e será distribuída con licencia Creative Commons. A distribución será a través de 3 canles: 

  • Descarga dende a súa web, en calidade media.
  • Venda dun DVD coa película en alta calidade, e os ficheiros dixitais e o software empregado para a súa realización.
  • En 35mm para a súa exposición en cines e festivais.

Para o que teña curiosidade pódese ver un avance dende a web dos creadores. 

O software libre ten que ser de balde?

NON

O software libre, segundo a definición da Free Software Foundation, é aquel que unha vez adquirido podes usar, modificar, distribuír, mellorar … libremente. Xa que logo, esta liberdade de uso é posterior á adquisición do software.

A principal fonte de confusión é que o termo inglés free pode significar libre ou de balde. Doutra banda, é moi habitual atopar o software libre dispoñíbel para a súa descarga na Internet de xeito gratuíto e legal.

Así, podemos atoparnos con dúas situacións á hora de obter unha aplicación libre:

  1. Dispoñíbel para a súa descarga na Internet.

  2. Dispoñíbel para a súa adquisición por un importe determinado. Neste caso é frecuente que o importe inclúa tamén algún tipo de asistencia e para a instalación e/ou matemento del. A diferenza co software privativo é que, unha vez pagado, poderemos empregalo tantas veces como desexemos ou distribuirllo libremente aos nosos amigos ou mesmo cobrar por el, sempre que manteñamos a mesma licenza.

Que é o software libre?

Software libre (free software) é calquera software sobre o que se ten a liberdade de executalo, copialo, distribuílo, estudalo, cambialo e melloralo sen necesidade de pedir permiso nin pagar licenzas de uso.

O termo free en inglés é ambiguo, e significa tanto ‘libre’ como ‘de balde’, o que leva a moita xente a confundir software libre con software de balde. Aínda que polo xeral o software libre está dispoñible de xeito gratuíto, non é unha condición obrigatoria.

"El Corte Inglés" venderá ordenadores con gnuLinEx preinstalado

“La Junta de Extremadura” e “El Corte Inglés” poñerán en marcha un Centro Experto en novas tecnoloxías da información e a comunicación ao amparo do convenio de colaboración rubricado hoxe en Mérida polo conselleiro de “Infraestructuras y Desarrollo Tecnológico de la Junta de Extremadura”, Luis Millán Vázquez de Miguel, e o director xeral de Informática de “El Corte Inglés”, Miguel María Latasa.
Pax. 550 de 551« Primeiro...102030...547548549550551

Pin It on Pinterest