Actualidade

O Software Libre xerará 6.000 millóns de dólares en 2011

A través dun estudo da IDC, revélase que, grazas ao crecemento sen fin do código aberto e dos investimentos crecentes por parte de inversores e das empresas, se está a acadar que o Software Libre cobre moito valor e agárdase que, para o 2011, estea a xerar uns 6.000 millóns de dólares ao ano. Con isto demóstrase, unha vez máis, que os programas libres teñen unha calidade cando menos igual ao software privativo…

Microsoft asina un acordo de colaboración co distribuidor de GNU/Linux Xandros

Microsoft declara nun comunicado que a compañía estadounidense e a provedora de Linux Xandros acadaron un acordo de colaboración moi amplo que se basea nunha serie de compromisos tecnolóxicos, mercantís e de propiedade intelectual que crean unha vía de unión entre a comunidade usuaria de código aberto e o software privativo.
Baixo os termos do acordo, Xandros ofrecerá tecnoloxía de servidores de Microsoft e desenvolverá ferramentas de software compatibles cos sistemas de Microsoft…

BMW aposta por GNU/Linux e Xen

BMW está a empregar Novell SuSE Linux Enterprise Server (SLED) e virtualizacións Xen nos seus centros de datos.

Segundo as declaracións do director de Solucións de Plataformas Abertas e vicepresidente de Novell, «A integración asegura que todas as pezas da solución traballarán ben en conxunto, igual que no caso do código aberto, xa que elimina os “bloqueos dos vendedores” e mellora a elección dos consumidores».

Despois dalgunhas probas no seu centro de investigación de EE UU e Alemaña, o grupo decidiu despregar un centro de datos virtual e empregar para iso SLED e Xen en Intel x86 dual-core. Segundo parece, engadirá unha flexibilidade maior ao ciclo de vida dos servidores…

FNB migra 12.000 equipos de escritorio a GNU/Linux

O First National Bank de Suráfrica estivo a avaliar GNU/Linux; como resultado, Novell Suráfrica anunciou que chegou a un acordo co First National Bank surafricano para estandarizar os 12.000 equipos de escritorio do banco.

O cambio destes equipos a GNU/Linux é o máis significativo en África canto ao uso de tecnoloxías libres. Un responsáble de Novell declarou que a habilidade da súa empresa de ofrecer un sistema completo que sexa capaz de dar soporte despois da implantación da solución é a longo prazo e que estabelecer unha relación de confianza co FNB foi a chave para chegar a este acordo. 

Colectivos de todo o estado protestan polas emendas do Senado á LAECAP

Diversos colectivos de todo o estado, entre os que se atopa AGNIX, protestan de xeito conxunto polas emendas introducidas o pasado día 31 de maio pola Comisión de Administración Pública do Senado á Lei de Acceso Electrónica dos Cidadáns ás Administracións Públicas (LAECAP).

En opinión destes colectivos estas novas emendas impiden que a lei recoñeza o dereito dos cidadáns a non ser discriminado polo tipo de hardware e software empregado. Ademais desaparecen as garantías de que as aplicacións informáticas desenvolvidas polas administracións vaian ser liberadas para o seu libre uso e distribución así como se impide que os cidadáns poidan auditar o código fonte daquelas aplicacións empregadas para realizar trámites coa administración.    

Software Libre de xestión para as bibliotecas extremeñas

As bibliotecas públicas estremeñas estarán conectadas entre si cunha aplicación de xestión libre, na que se está a traballar na actualidade e que se prevé que estea en funcionamento o vindeiro ano.

Isto permitirá aforrar miles de euros anuais á Junta de Extremadura, segundo o anuncio feito hoxe en rolda de prensa polo director xeral de Promoción Cultural da Consejería de Cultura, o director de xestión da Asociación de Universidades Populares de Extremadura (Aupex) e a directora do Plan de Alfabetización Tecnológica.

Liberado BulmaGés V 0.9.3

A asociación IGLUES (Iniciativa de Gestión Libre Universal para Empresas y Sociedades) fomenta dende o ano 2004 o desenvolvemento de aplicacións de xestión libres para PEME.

O xoves pasado dende IGLUES anunciaron a liberación de BulmaGés V 0.9.3 unha nova revisión estable deste software de xestión para PEME e que se pode descargar dende http://prdownload.berlios.de/bulmages/bulmages-0.9.3.tgz

Este paquete de software está formado por un programa adicado á facturación (BulmaFact) e outro destinado á contabilidade (BulmaCont). BulgaGés é o resultado de cinco anos de desenvolvemento e que nos acerca cada vez máis á versión 1.0.

Petición de axuda para rematar a tradución do phpBB3 dende CiberIrmandades da Fala

http://www.mancomun.org/images/stories/phpbb.png Esta é a petición de axuda das CiberIrmandades da Fala para rematar a tradución do sistema de foros phpBB3:

“O domingo, día 10 de xuño, os responsables do phpBB3, popular sistema de foros (ver foros da CiberIrmandade), van facer unha limpeza de todos os paquetes de idioma “sobrantes” do que hai agora como descargas dispoñibles na web oficial. A data límite para enviar a tradución completa é o domingo día 10 ás 12 do mediodía, e a nosa lingua ten que estar aí. Axúdanos.

Aínda que existen opcións de que admitan unha versión incompleta, previa comprobación e valoración do estado da mesma, queremos que a nosa lingua estea dispoñible dende o primeiro día, para o que precisamos axuda para revisar erros e traducir algunha cousa pendente…”

QLandkarte, software de cartografía para GNU/Linux

QLandkarte é un software cartográfico GPL que vén a cubrir parte das necesidades deste tipo de aplicacións para GNU/Linux.

Así relata o seu autor o nacemento do proxecto: “Encontrei varias ferramentas como GPSBabel e sendmap para manexar datos do meu GPS; pero non ferramentas para visualizalos e xestionalos de forma correcta. Na miña busca atopei en Sourceforge unha especificación do formato IMG usado para os mapas. Despois de moito tempo lendo e probando a especificación, considereina o suficientemente boa como para desenvolver unha interface para visualizar estes ficheiros usando esta especificación. QLandkarte é o resultado deste esforzo.”…

Pin It on Pinterest