Actualidade

Network PDF Server YAFPC-Appliance 2.00, servidor de impresión PDF

Network PDF Server YAFPC-Appliance é unha imaxe baseada en SLAX Linux e que conta cunha versión configurada de YAFPC. Calquera computador iniciado dende este CD pode traballar como servidor de impresión PDF e fornecer ilimitadas impresoras compartidas. A configuración do sistema pode administrarse por medio dun navegador web dende calquera punto da rede. As impresoras pódense configurar para aplicar encabezados de cartas, marcas de auga e/ou apéndices a tódolos documentos impresos. Despois da impresión os documentos son enviados ao seu propietario por correo electrónico ou quedan accesibles nunha carpeta compartida no servidor.

Os requirimentos que precisa o sistema son baixos e a posta en funcionamento é moi sinxela. Para testar a funcionalidade do sistema están dispoñibles imaxes preparadas para traballar en VMware. Tamén existe documentación para a posta en funcionamento dende un lapis USB.

Descarga da imaxe ISO.

Liberada Ubuntu 7.04 Feisty Fawn Beta

http://www.mancomun.org/images/stories/ubuntu.png Xa está dispoñible a versión beta de Ubuntu 7.04 Feisty Fawn, entre as novidades destacan GNOME 2.18 e o Kernel 2.6.20. En Ubuntu esperan que a versión estable se libere en abril deste ano.

Outras novidades importantes son un xestor de redes, con e sen fíos, que facilita a conexión e con soporte WPA, unha ferramenta para ver a análise de uso do disco duro, comprobación automática dos códecs necesarios para a reprodución multimedia, Xorg 7.2 e moitas novidades máis.

Esta versión beta pódese descargar dende o enderezo web http://releases.ubuntu.com/feisty/
ou http://releases.ubuntu.com/7.04/

Varios grupos parlamentarios realizan enmendas á LAECAP para garantir o uso de estándares abertos

Varias formacións políticas (BNG, Chunta Aragonesista, CIU, ERC e IU-ICV) veñen de apoiar as enmendas que Hispalinux, asociación de usuarios españoles de Linux, propón para o proxecto de lei para o acceso electrónico dos cidadáns á administración pública (LAECAP). As reformas propostas están orientadas a garantir o emprego de estándares abertos e son basicamente dúas:

  • A eliminación da expresión “estándares internacionais aceptados” deixando que exclusivamente se fale de que as administracións públicas deben usar só estándares abertos para relacionarse cos cidadáns e a inclusión no anexo da definición de “estándares abertos” (especificacións públicas e gratuítas, libres de regalías e patentes e que teñan unha implementación de referencia baixo unha licenza libre).
  • A modificación do artigo 45 para que todas as Administracións Públicas poñan a disposición dos cidadáns e das outras administracións o software sobre o que teñen dereito baixo unha Licencia que permita que sexa usado en calquera propósito, copiado, modificado e redistribuído con ou sen cambios. Sempre que as obras derivadas garantan estas mesmas liberdades (como o fan a Licenza Pública da Unión Europea (EUPL) ou a General Public License (GPL)).

Os docentes de Bos Aires aprenderán GNU/Linux

IBM Arxentina asinou un acordo co goberno da provincia de Bos Aires para promover a educación tecnolóxica, que inclúe a formación dos docentes das escolas técnicas no sistema de código aberto GNU/Linux. O acordo fomentará políticas e cursos de acción para lograr unha mellor formación tecnolóxica.

A primeira etapa do proxecto consiste en capacitar a docentes de escolas técnicas da Provincia de Bos Aires no sistema de código aberto GNU/Linux e en programación dentro do perfil de Técnico/a en Informática Persoal e Profesional.

ISO facilita a descarga das especificacións de ODF de balde

Nun xesto para facilitar a súa difusión ISO puxo libre para a súa descarga as especificacións do seu estándar ISO 26300 (antes había que pagar 200 €). Para os non iniciados son as especificacións do formato que usan OpenOffice.org, Koffice, StarOffice e outras suites de ofimática, etc.

O nome oficial é “Open Document Format for Office Applications. (OpenDocument) v1.0”.

Para os interesados no estudo e na implementación de aplicacións contra este estándar é unha novidade o xesto da ISO.

Fonte: Libro blanco  

A Aula TIC-PEME da USC incorpora WebHuddle

A Aula TIC-PEME da USC vén de incorporar unha nova ferramenta Open Source. Neste caso, trátase do WebMinar denominado WebHuddle.

Coñécese como “Webminar” (entre outros termos, como online meeting, webmeeting, live web conferencing, etc.) a un tipo de software con interface web popularizado no contorno empresarial, que permite a unha persoa organizar a través de Internet unha reunión virtual entre un grupo de xente determinado. Estes programas integran unha serie de ferramentas de comunicación fundamentalmente sincrónicas (audio streaming, chat, vídeo, pizarra electrónica compartida, escritorio remoto compartido, etc.) para facilitar a interactividade entre os asistentes.

Un exemplo de utilización de WebHuddle atopámolo no Centro de Supercomputación de Galicia (CESGA), como pode verse no enderezo http://webminar.cesga.es.

O concello de Rianxo impartirá un curso de introdución a GNU/Linux

http://www.mancomun.org/images/stories/rianxo.jpg Co título de “Linux: a alternativa”, o concello de Rianxo impartirá un curso de introdución ao sistema operativo GNU/Linux orientado ao público en xeral pero cunhas horas de formación específica para o persoal do concello.

O curso celebrarase os días 2, 3 e 4 de abril, e está destinado a persoas de todas as idades e que están iniciadas no mundo da informática.

Para inscribirse hai que acercarse á Casa da Cultura “Cuartel Vello” na Praza de Castelao de Rianxo, ou chamar aos seguintes teléfonos: 981866663, 981866381 ou mandar unha mensaxe ao seguinte enderezo de correo: informatica@rianxo.com

Europa, Brasil e China únense nunha plataforma de programas informáticos libres

http://www.mancomun.org/images/stories/qualipso.jpgEuropa, Brasil e China uníronse para lanzar unha plataforma global que fomente a adopción de programas informáticos de fonte aberta/gratuíta (FLOSS) por parte de empresas, gobernos e institucións académicas.

QualIPSo (Quality Platform for Open Source Software), é unha infraestrutura para investigar e utilizar procesos de desenvolvemento en execución incluíndo modelos, métodos e ferramentas de negocio para fomentar o emprego do Software Libre por organizacións TIC europeas.

O proxecto espera alcanzar estes obxectivos desenvolvendo programas informáticos de fonte aberta/gratuíta (FLOSS) como alternativa flexible e de baixo custe aos programas informáticos privativos, co mesmo nivel de confianza co que tradicionalmente se asocian aos programas informáticos non gratuítos.

Fonte: La Flecha

Amigus dará relatorios de Software Libre en institutos da zona

http://www.mancomun.org/images/stories/amigus.gif Dende o vindeiro luns e ata mediados de abril, Amigus (Asociación Informática de As Pontes) volve aos colexios levando na mochila un cargamento de Software Libre.

Os relatorios serán de presentación do Software Libre para alumnos de 3º e 4º da ESO nos institutos da zona.

As datas confirmadas son as que seguen:
26/03/2007 ás 10.30 horas no CPR Nebrija – Pardo Bazán
28/03/2007 ás 10.30 horas no IES Moncho Valcarce
11/04/2007 ás 11.00 horas no CPI Monte Caxado
12/04/2007 ás 11.00 horas no IES Concepción Arenal de Ferrol

Pin It on Pinterest