Actualidade

Un total de 1784 resultado(s) para software

Redeiras, a nova rede social 100% software libre para o profesorado galego

  • A nova rede social será un espazo de encontro, de comunicación e colaboración entre os docentes

A Consellería de Cultura, Educación e Ordenación Universitaria vén de crear Redeiras, unha rede social, baseada 100% en software libre, para favorecer a intercomunicación entre o profesorado galego, proporcionándolle un espazo de encontro, comunicación e colaboración onde intercambiar ideas, propostas, recursos, actividades, iniciativas, etc. como complemento á súa práctica educativa.

RedeirasTrátase dun proxecto desenvolto por Asesores Abalar, fundamentado en tecnoloxías baseadas en software libre (ELGG e LAMP), que toma como base o núcleo da ferramenta de software libre ELGG para crear unha nova rede social integrada no sistema corporativo de autenticación de usuarios da Consellería que incorpora módulos e funcionalidades propias.

Día da Liberdade dos Documentos

Libera os teus documentos

Hoxe 28 de marzo de 2012 celébrase o Día da liberdade dos Documentos (DFD). Trátase dunha iniciativa a nivel mundial promovida pola Free Software Foundation Europe que se celebra dende hai 3 anos o derradeiro mércores do mes de marzo. O obxectivo deste día é chamar a atención sobre a importancia de conservar os documentos dixitais que empregamos en formatos libres e baixo estándares abertos, así como promover a adopción de formatos de documentación abertos.

GNOME 3.4 dispoñible 100% en galego

Hoxe 28 de marzo de 2012, segundo a planificación de publicacións do proxecto GNOME, publícase GNOME 3.4, a primeira versión do Ano da Accesibilidade de GNOME.

Video-Chat en Gnome 3.4

Con esta nova versión, GNOME mellora aínda máis a experiencia do usuario con numerosos retoques no tema visual e introducindo novos e modernos aplicativos perfectamente integrados na moderna concepción do escritorio GNOME 3. Ademais fíxose un importante traballo na mellora da accesibilidade deste contorno de escritorio.

E por suposto, unha vez máis debemos agradecer o espectacular traballo que Fran Diéguez e o equipo de tradución de GNOME ao galego están a facer e que nos achega GNOME 3.4 dispoñible 100% en galego. Nesta ocasión ademais achégannos o 40% da documentación e o 77% dos aplicativos extras de GNOME tamén en galego.

Ademais, o equipo galego de GNOME informa que ten preparadas algunhas sorpresas para os próximos días ás que haberá que estar atentos.

Trasno colabora no IV Fiadeiro de localización de software libre na USC

Logotipo de TrasnoPor cuarto ano consecutivo a comisión de Normalización Lingüística da Escola Técnica Superior de Enxeñaría da USC desenvolverá o IV ETSE Open de SL / Fiadeiro de localización de Software Libre en colaboración co Servizo de Normalización Lingüística da USC e co Proxecto Trasno da man de Enrique Estévez Fernández, coordinador do equipo galego de localización dos produtos de Mozilla e Antón Méixome, lingüista e coordinador do equipo galego de localización de OpenOffice e LibreOffice.

Como nas 3 edicións anteriores o obxectivo deste fiadeiro é promover o uso e coñecemento do software libre e da lingua galega na comunidade universitaria da USC a través da localización ao galego de aplicativos libres.

O ETSE está aberto a toda a comunidade universitaria da USC: alumnado, PDI e PAS, e é de carácter gratuíto. Conta con 24 prazas e para todos aqueles interesados xa está aberto o prazo de matriculación ata o vindeiro 15 de abril a través da Secretaría Virtual da USC.

Petición de contribucións para as XI Xornadas Libres organizadas por GPUL

Logo de GPULDende GPUL anuncian que un ano máis comezan a organizar as xa senlleiras Xornadas Libres, que consistirán, coma sempre, nunha serie de charlas, obradoiros e concursos con contidos do máis heteroxéneo, pero sempre xirando arredor do mundo do software libre, do hardware libre os estándares abertos ou mesmo a cultura libre en xeral.

As XI Xornadas Libres, que están dirixidas a todos os públicos con interese no mundo libre, celebraranse na Facultade de Informática da Universidade da Coruña do 23 ao 27 de abril de 2012.

Co anuncio publicado onte ábrese ata o 7 de abril o período para remitir propostas de charlas ou actividades a través do formulario habilitado na plataforma de xestión de contribucións, previo rexistro no evento.

Seminario técnico sobre Zentyal no CNTG

Logotipo de ZentyalO Centro de Novas Tecnoloxías de Galicia organiza un Seminario técnico sobre o servidor Linux para PEMES, Zentyal para o vindeiro día 26 de abril, de 16:30 ata, aproximadamente, as 20:00 horas.

A xornada vai especialmente dirixida ao persoal técnico, tanto do sector público como privado, que teña responsabilidades, exerza e/ou oriente a súa actividade no eido da administración de sistemas, así como a calquera persoa de perfil técnico con interese na temática.

O obxectivo da xornada é a presentación desta plataforma de administración e dos principios que rexen o seu deseño: boas prácticas, integración de servizos, interface de administración unificada, configuracións probadas en múltiples contornos…Durante a presentación usarase unha instalación de Zentyal sobre a que se irán probando e resolvendo as posibles dúbidas sobre as distintas posibilidades presentadas.

O 84% dos internautas españois usan Software Libre

Logotipo de CENATICSegundo os datos do estudo que vén de publicar Observatorio Nacional do Software de Fontes Abertas de CENATIC sobre o Uso do Software Libre nos fogares Españois 2011, o 84% dos internautas españois xa están a usar software libre, cun nivel de satisfacción próximo ao 80%.

A enquisa presentada onte forma parte do Panel de Indicadores sobre Software Libre en España, un proxecto do Observatorio de CENATIC cuxos datos se obteñen segundo estándares europeos, e constitúe o primeiro achegamento estatístico ao ecosistema económico do software libre, en colaboración co Instituto Nacional de Estatística (INE), e o Instituto Nacional de Tecnoloxías da Comunicación (INTECO). De feito, para a realización desta enquisa contouse cunha mostra panelizada de fogares do propio INTECO, e unha metodoloxía de enquisa online na que participaron 3.050 internautas maiores de 15 anos.

IV noite Drupal & GNU/Linux

IV noite DrupalAs asociacións GALPon, Comunidade O Zulo, Inestable e a Asociación Ociorum de A Coruña organizan a IV noite Drupal & GNU/Linux, que desta volta celebrarase o vindeiro día 24 de marzo no local da Asociación Cultural Ociorum en A Coruña.

As #noitedl xorden en abril de 2011 en Mugardos froito dunha iniciativa conxunta das citadas asociacións. En xullo de 2011 trasladaron a sede cara ao sur, na cidade de Vigo e o pasado decembro de 2011 escolleron Ordes para celebrar a terceira edición. Nesta cuarta edición decidiron ampliar e flexibilizar os horarios así como “abrir” o evento a todos os niveis e persoas interesadas no desenvolvemento web e no software libre.

Esta actividade é de carácter gratuíto, e só precisa de inscrición por motivos organizativos.

Chamamento á participación na GUADEC 2012

Logo da GuadecComo xa anunciamos no seu momento, a edición da GUADEC do ano 2012 vaise celebrar en Galicia, na cidade de A Coruña, cidade que xa acolleu diversos encontros ou hackfests do proxecto GNOME nos últimos 3 anos. Esta edición está a ser organizada por GPUL coa colaboración da asociación Ghandalf, a Universidade da Coruña, e co apoio da Xunta de Galicia, GNOME Hispano e Igalia.

A conferencia terá lugar entre o 26 e o 29 de xullo na Facultade de Informática da Universidade da Coruña, con días extras adicionais despois para a celebración de hackfests e reunións.

A GUADEC é a conferencia anual da comunidade de GNOME, celebrada en Europa dende o ano 2000. GNOME é o proxecto de Software Libre que produce as interfaces de usuario de moitos dos dispositivos con GNU/Linux, dende ordenadores portátiles ata teléfonos intelixentes, ou equipos multimedia persoais. Trátase pois do acontecemento mundial que reúne ao maior número de persoas involucradas no desenvolvemento de interfaces libres de escritorio ou de usuario móbil.

Dende a organización da GUADEC 2012 agardan reunir a centos de participantes para discutir e dirixir o futuro do proxecto de GNOME. Hoxe mesmo acaban de publicar o chamamento á participación nesta edición da GUADEC. O comité do programa agarda as vosas propostas de participación na GUADEC para contribuír a que este acontecemento se converta nun gran éxito. Son benvidas as contribucións de desenvolvedores, artistas, tradutores, usuarios, representantes do goberno, da educación, do sector empresarial ou calquera outro que comparta o interese no proxecto.

Dispoñible LibreOffice 3.5 en galego

Onte, a Document Foundation anunciou a dispoñibilidade da nova versión da suite ofimática libre LibreOffice 3.5. que achega aos usuarios todas as melloras derivadas da estratexia de desenvolvemento adoptada en Setembro de 2010 cando naceu esta suite ofimática.

Infografía das funcionalidades destacadas de LibO 3.5E por suposto está dispoñible integramente en galego grazas ao excelente traballo da comunidade de tradución ao galego de LibreOffice coordinada por Antón Méixome.

LibreOffice 3.5 é o resultado do esforzo combinado de desenvolvedores a tempo completo – o maior grupo de desenvolvedores experimentados de OpenOffice.org – e desenvolvedores voluntarios, coordinados polo Engineering Steering Committee. Durante 16 meses, unha media de 80 desenvolvedores foron quen de facer mensualmente 30.000 modificacións ao código, introducindo así novas e interesantes funcionalidades á suite entre as que destacan importantes melloras á hora de importar ficheiros con formatos non estándar provintes de MsOffice.

Ademais a nota da publicación destaca as seguintes funcionalidades:

Pax. 50 de 179« Primeiro...102030...4849505152...607080...Último »

Pin It on Pinterest