Actualidade

Un total de 592 resultado(s) para Educación

A Oficina de SwL da USC fai balance dos cursos da Universidade de Verán realizados

OSLUSCA Oficina de Software Libre da USC fai estes días balance na súa web dos dous seminarios que impartiu o pasado mes de xullo no marco dos Cursos de Verán que organiza cada ano a universidade compostelá. Estes cursos, Introdución a GNU/Linux Ubuntu e A revolución do Software Libre, forman parte do programa de accións formativas en software libre que a Oficina está a levar a cabo para cumprir cos obxectivos previstos no plan de actuacións para o ano 2009. O próximo e último curso, neste contexto, será O Software Libre e a Lingüística, que terá lugar no mes de setembro.

No curso "Introdución a GNU/Linux Ubuntu" , que transcorreu na ETSE entre os días 27 e 31 de xullo, tivo unha asistencia de 50 persoas. Sobre estas, segundo sinalaron os organizadores, “destacou unha enorme diversidade na orixe e nos intereses que os levaron a participaren neste curso práctico sobre o traballo diario coa distribución de GNU/Linux Ubuntu”.

Para o desenvolvemento da actividade contouse con cinco profesores que alternaron a súa labor de profesor principal coa de colaborador, axudando aos alumnos que se atopaban con algún problema, que non entendían algún concepto ou que simplemente querían saber máis sobre algo en particular. Os alumnos instalaron a versión de Ubuntu 9.04, dende un USB de 2 GB contra un USB de 8 GB co que se traballou durante toda a semana e que, precisamente, se lle foi entregado a cada un dos asistentes pola súa participación.

Klavaro: aplicativo para aprender a mecanografar

klavaroKlavaro é un aplicativo multiplataforma que che permite aprender a manexar o teclado do teu computador de maneira que poidas lograr a velocidade, precisión e corrección dun bo mecanógrafo aforrándoche moito tempo.

O menú do aplicativo divídese en varias seccións, segundo o seu grao de dificultade:

  • Nivel 0 ou de introdución: neste nivel explícanse os conceptos básicos, como poñer os dedos no teclado, que letras se pulsan con cada dedo, etc… usando un sinxelo asistente
  • Nivel 1 ou curso básico: consiste en reproducir co teclado os caracteres que van aparecendo en pantalla.
  • Nivel 2 ou adaptabilidade: indicado para a memorización das teclas, no cal hai que reproducir as palabras, símbolos e números que aparecen misturados de xeito aleatorio.
  • Nivel 3 ou velocidade: similar ao anterior pero no que só practicará con palabras reais e aleatorias de xeito que poida gañar velocidade na escritura.
  • Nivel 4 ou fluidez: é o último nivel e nel practicará con textos reais completos e con construcións gramaticais lóxicas.

Algunhas das estatísticas que proporciona o programa son:

  • % de erros, precisión, fluidez e tempo.
  • Velocidade en palabras por minuto (PPM) e caracteres por segundo (CPS)

Proxecto Canaima en Venezuela: portátiles con Linux para a educación

A semana pasada, o Ministerio de Educación venezolano comezou o seu programa chamado “Proxecto Canaima” para fornecer as escolas primarias de “notebooks” de xeito que poidan incorporar as novas tecnoloxías no sistema educativo. Esta acción estase vendo complementada con talleres de formación para o profesorado que se están levando a cabo durante as semanas de vacacións do verán.

En setembro comezará o reparto das primeiras 50.000 unidades nuns 1150 colexios. Os portátiles terán sistema operativo Linux e forman parte dunha primeira partida dun lote total duns 350.000 portátiles que o goberno lle venezolano comprou ao goberno portugués. O portátil fabricado polo goberno portugués é o coñecido co nome de portátil Magalhães

O proxecto Opencast no que participa a UVIGO recibe unha inxección económica de 1,5 millóns de dólares

Uvigo

Visto no “Diario da Universidade de Vigo”:

“Tras converterse na primeira universidade de fala hispana en ofrecer contidos na plataforma iTunes U, a institución académica viguesa volve estar de en hora boa ao dar un paso adiante na posta en marcha do proxecto, de impulso ás novas tecnoloxías na docencia, Opencast Matterhorn. Vigo, xunto con outras doce universidades internacionais, beneficiarase dun financiamento de 1,5 millóns de dólares, do cal recibirá un 5%, achegado polas fundacións Mellon e Hewlett.

Trátase dun novo sistema que pretende posibilitar o tratamento completo de contidos audiovisuais na docencia universitaria, “unha tarefa que a Universidade xa leva desenvolvendo co software libre Pumukit, unha ferramenta importante e un dos motivos polos que nos situamos no máis alto xunto a outras universidades de todo o mundo”, sinala Anxo Sánchez, vicerreitor de Novas Tecnoloxías e Calidade.

A Universidade de Vigo xa ten experiencia suficiente neste campo “e así o amosamos co Pumukit, que está a disposición da comunidade universitaria e está a ser empregado por diversas institucións da Península e Latinoamérica, sendo o sistema máis estendido en países de fala hispana”, sinala Sánchez. Isto permitiu que a Universidade “estea aí entre outras a nivel internacional definindo un estándar de contidos docentes multimedia”, engade.

Centre, un sistema libre para a administración de colexios

Centre SIS é un sistema de información libre para escolas públicas e privadas. Baseado na web, este aplicativo de código aberto, permite a xestión da actividade académica coa inclusión da información demográfica do estudantado, a programación, as faltas de asistencia, as fichas de cada estudante, as súas cualificacións, etc.

A ferramenta foi desenvolvida pola empresa Miller Group co propósito de facer fronte ás necesidades máis importantes dos administradores, mestres, persoal de apoio, pais, estudantes e persoal administrativo dos centros educativos. Ademais incorpora compoñentes que non se atopan comunmente nos sistemas de información de estudantes.

Por exemplo, o aplicativo permite buscar estudantes non só polos seus datos persoais, senón tamén polos seus horarios, actividades, cualificacións… Pero quizais o dato máis importante é que, ao estar baseado na web, o sistema está dispoñíbel desde calquera punto con conexión a internet, permitindo aos pais e estudantes -ou calquera outra entidade con competencias no asunto- acceder á información que o centro queira facer pública.

A Xunta impulsará o software libre en Galicia potenciando a súa implantación en pemes e universidades

A secretaria de Modernización e Innovación Tecnolóxica, Mar Pereira, presidiu hoxe unha xuntanza coas tres universidades, o CESGA e as empresas do sector para avaliar o progreso do software libre na nosa comunidade e estabelecer novas liñas de actuación a prol do desenvolvemento deste.

A secretaria manifestou, no encontro que tivo lugar na sede do CESGA, que o Goberno galego impulsará a implantación do software libre en toda a nosa comunidade, especialmente, en áreas como as pemes ou a través de liñas de colaboración coa Universidade ou centros de investigación, para potenciar a súa aplicación aos sectores produtivos e estratéxicos de Galicia.

“O que demanda a sociedade, o empresariado e o empregado público son solucións que lle fagan a vida e o traballo máis doado e, no caso das empresas, que incrementen a súa competitividade”, observou Pereira. “O software libre ten un interesante potencial para crear modelos de negocio, de contratación de servizos tecnolóxicos, o que dinamiza o sector TIC local”, apuntou. A secretaria avogou por manter un contacto directo e continuo con todos os axentes: empresariado, institucións e as comunidades de desenvolvemento de software libre “clave”, dixo, para orientar axeitadamente as políticas tecnolóxicas e facelo partícipe das mesmas.

Conferencias, talleres e concursos de software libre na Campus Party de Valencia 09

campus partyOnte, 27 de xullo, comezou a Campus Party 2009 de Valencia, un dos maiores encontros de tecnoloxía, ocio e cultura dixital en rede do mundo e que se ven realizando desde o ano 1997.

Hai xa tempo que a filosofía do software libre está presente na Campus Party, ao promover o coñecemento libre con distintas actividades, talleres, etc…

A continuación detallámosvos algunhas das actividades deste ano:

  • Conferencia sobre Arduino
  • Conferencia sobre o sistema operativo EyeOS
  • Taller de prototipos de xoguetes con Arduino
  • Curso de PHP
  • Taller de monitorización de redes e prevención de ataques básicos con Snort

Ademais este ano, vaise levar a cabo a segunda edición do premio "Enjuto de Oro", que consiste en desenvolver un aplicativo para dispositivos móbiles que permita o acceso a contidos da páxina web da RTVE. O código do aplicativo que se desenvolva ten que ser software libre. O premio son 1.000 € máis un teléfono móbil…

Unha compañía andaluza lanza Edu 2.0, unha plataforma baseada en SwL que facilita a aprendizaxe en centros escolares

Edu 2.0A compañía andaluza Isotrol acaba de poñer en marcha ‘Edu 2.0‘, unha plataforma tecnolóxica baseada en software libre e que recolle un conxunto de utilidades deseñadas para facilitar, a través de imaxes e exercicios prácticos, a aprendizaxe de conceptos e temas impartidos nos centros escolares.

Nunha nota, a compañía indicou que con esta ferramenta preténdese reforzar o sistema de aprendizaxe en niveis de primaria e secundaria, ademais de apoiar as políticas sociais emprendidas en educación desde o goberno.

‘Edu 2.0’ está baseada en software libre e en Ubuntu e atópase dispoñíbel para a súa descarga de forma gratuíta desde calquera ordenador conectado a Internet (www.edu2punto0.org). Ademais, destacou o uso "fácil e intuitivo" dos diferentes programas, a súa adaptación ao temario de niveis de Primaria e Secundaria e, "ante todo, a posibilidade de ser usado de forma libre e gratuíta por calquera usuario dentro ou fóra das aulas".

AGASOL e cinco GGUL ofertarán un 20% de desconto adicional na matrícula do Máster de Software Libre

O Máster deu a coñecer hoxe as novidades que introducirá a súa terceira edición

Cinco grupos galegos de usuarios de software libre: GHANDALF, GLUG, Agnix, Ousli e GALPon, e a Asociación Galega de Empresas de Software Libre (AGASOL) promoverán a inscrición na terceira edición do Máster en Software Libre tras o acordo estabelecido con Igalia para convertérense en colectivos con desconto. Segundo isto, os membros destas asociacións terán dereito a un 20% de desconto na matrícula do curso.

Con esta iniciativa, e atendendo aos seus principios de promoción do software libre, estas seis agrupacións -ás que os organizadores esperan que se sumen outras- pretenden potenciar a formación de profesionais cualificados no eido do SwL co fin de consolidar unha comunidade galega forte e estábel, na que convivan os tres piares fundamentais: voluntariado, empresariado e Administración.

Esta medida deuse a coñecer hoxe xunto coa publicación do resto de información relativa ao curso 2009/2010 do Máster de Software Libre, que organiza a empresa Igalia en colaboración coa Universidad Rey Juan Carlos. Entre as novidades introducidas con respecto á edición anterior destacan, ademais da política de descontos aos colectivos, os criterios de descontos por matriculación en xullo (10%) ou aos dous mellores expedientes (30%), entre outras consideracións.

Numpty Physics, xogo de simulación de física

Numpty Physics é un xogo de debuxo de quebracabezas que consiste en crear bloques, ramplas, balanzas ou calquera cousa que necesites para conseguir que a bola vermella chegue ata a estrela amarela. Para iso, o xogo está dotado dun motor físico (Box2D Physics Engine) que fai que calquera forma que se debuxe, responda de forma case totalmente real, dependendo da súa forma e tamaño.

Este xogo ben se pode considerar unha alternativa ao Crayon Physics que tamén usa o mesmo motor de físicas.

Ademais, Numpty Physics inclúe un editor que che permite crear os teus propios niveis. O editor consta dunha paleta de cores, ademais de diversas ferramentas de trazado (para debuxo de obxectos activos, inactivos ata que non entren en contacto cun obxecto activo e decoración do escenario). Os niveis editados poden ser posteriormente gardados e mesmo enviados por correo electrónico aos desenvolvedores do proxecto.

Para aqueles que acaben os niveis predefinidos que trae o xogo, desde a páxina do proxecto tamén se pode atopar un conxunto de novos niveis feitos polos usuarios.

Pax. 40 de 60« Primeiro...102030...3839404142...5060...Último »

Pin It on Pinterest