Actualidade

Un total de 3264 resultado(s) para Outras novas

XIII Xornadas Libres de GPUL

A vindeira semana, do 8 ao 10 de outubro terá lugar unha nova edición das Xornadas Libres do Grupo de Programadores e Usuarios de Linux (GPUL) na Facultade de Informática da Universidade da Coruña. Estas son xa as XIII xornadas, o que fai delas un dos eventos de promoción do software libre máis antigo da nosa terra.

Imaxe do banner do portal das Xornadas Libres

Un ano máis estas xornadas, contarán co apoio de antigos alumnos da facultade, de socios do GPUL, de empresas do sector e doutras asociacións comprometidas co mundo libre, co obxectivo de achegar aos asistentes ao mundo do hardware, software e a cultura libre en xeral.

Durante os 3 días que duran as xornadas, haberá diversas actividades de todos os niveis, dende introdutorio a avanzado e enfocadas tanto a estudantes como a profesionais do sector.

Santiago acolle esta fin de semana o I Encontro ibérico de tradutores de Software Libre

  • Pascal Chevrel, o responsable de internacionalización de mozilla.org, asistirá ao I Encontro ibérico de tradutores de Software Libre a linguas minorizadas.
  • Os días 4 e 5 de outubro Santiago de Compostela acolle este primeiro encontro baixo o lema “Porque acceder á tecnoloxía no noso idioma é un dereito!
  • Galicia, Asturias, Aragón, Euskadi e Cataluña estarán representadas neste encontro de grupos nacionais de tradución de software a linguas minorizadas.

Banner do Encontro Ibérico de tradutores de software libre

Esta fin de semana reuniranse en Santiago de Compostela por primeira vez todos os grupos de tradutores de Software Libre ás linguas minorizadas, ou en risco de desaparición, da península ibérica: SoftAstur, Librezale, SoftAragonés e SoftCatalá, exercendo Proxecto Trasno de anfitrioa deste primeiro encontro.

A organización informa que ademais dos integrantes dos devanditos grupos de tradución, asistirá tamén algún membro de equipos de tradución extrapeninsulares, como é o caso do Francés representado por Pascal Chevrel, quen ademais é o responsable de internacionalización de mozilla.org, quen contribuirá á posta en común para a mellora dos procesos de traballo destas comunidades de tradución.

A Oficina de Coordinación de Software Libre da Amtega, estará tamén presente neste encontro, para escoitar as demandas e necesidades da comunidade de tradución de software libre de Galicia.

María Oliveira, doutora de estatística pola USC, recibe o premio John Chambers Statistical Software

Logo do software estatístico RHai uns días falabamos da necesidade de superar a fenda de xénero nas TIC e especialmente no eido do Software Libre a raíz da xornada Freeday4Girls, Software Libre e muller, facendo énfase na necesidade de visibilizar experiencias de mulleres que sirvan de modelo ás futuras profesionais.

Hoxe informamos de que a doutora en Estatística pola USC María Oliveira Pérez recibiu o premio John Chambers Statistical Software na súa edición de 2014, pola elaboración dun paquete para o software estatístico R, que distribúe con licenza libre . É primeira vez que este premio é recibido por unha universidade española, converténdose así María Oliveira na primeira muller española que recibe este galardón, dotado cun premio en metálico de 1.000 dólares.

Xornada sobre Software Libre e muller

Este venres 26 de setembro de 2014 de 9:30 a 14:00 horas celébrase a xornada Freeday4Girls, no Centro de Novas Tecnoloxías de Galicia de Santiago de Compostela.

Trátase dunha xornada organizada pola Oficina de Software Libre do CIXUG, cuxo principal obxectivo é visualizar e promover o rol da muller no eido do software libre en Galicia.

A día de hoxe a proporción de mulleres que se adican ao ámbito das tecnoloxías é moi inferior á proporción de mulleres que se atopa na sociedade, e se nos centramos no eido do software libre, a porcentaxe é aínda menor. Ás veces por inseguridade, por prexuízos, ou mesmo por falta de coñecemento de modelos femininos neste campo, é posible que as mulleres non se acheguen ás tecnoloxías e ao software libre e que o vexan como algo alleo a elas, cando non debería ser así.

Con esta xornada a OSL do CIXUG quere contribuír a loitar contra a fenda de xénero nas TIC, achegando experiencias de mulleres galegas inspiradoras que adican o seu día a día a desenvolver a súa profesión no ámbito das tecnoloxías. Poderedes coñecer proxectos, ferramentas e mulleres que traballan e utilizan o software libre en diferentes disciplinas: creatividade, deseño, xestión, formación, etc.

Nova edición do Kernel 2014 incluíndo celebración do Día da Liberdade do Software

Hoxe arranca o "XI Ciberencontro Kernel 2014" na Casa da Cultura do Concello de Mugardos, unha nova edición deste evento lúdico-tecnolóxico que vén celebrando Mugardos dende o ano 2004.O evento é organizado conxuntamente pola Asociación Comunidade O Zulo e o Concello de Mugardos.

Banner do kernel 2014Durante toda a fin de semana daranse cita máis de 60 persoas apaixonadas polas tecnoloxías e polo Software Libre. Ademais dos inscritos pode acudir calquera persoa interesada en asistir de público aos numerosos relatorios que terán lugar no mesmo.

Como en todas as edicións, o Software Libre ten un espazo de seu no Kernel. 

Celebración do "Día da liberdade do software"

Así, como se pode ver no programa, ademais do Drupal BoF, reunión informal na que hoxe a partir das 20:30 compartirán experiencias sobre o xestor de contidos libre Drupal, mañá sábado, dende as 12:00 terá lugar, como xa vén sendo habitual nos últimos anos, a celebración do "Día da liberdade do software".

Diversos entusiastas do software e cultura libres xuntaranse para contar as súas experiencias como comunidade:

Comeza aRtropocode. Encontro multidisciplinar de traballo conxunto a prol da cultura e aprendizaxe libres

Dende hoxe e ata o 21 de setembro, celébrase na NORMAL da Coruña unha nova edición de aRtropocode, un summerlab co título Simbioses creativas entre corpo(s), tecnoloxía(s) e ecoloxía(s).

Banner do artropocodeUn summerlab é un evento comunitario, libre, aberto e gratuíto; impulsado por axentes locais e vencellado ao contexto no que se desenvolve; unha organización de actividades na que toda persoa interesada pode propoñer contidos; onde os participantes comparten coñecemento e aprenden “facendo”; onde se fomenta o Faino-ti-mesmo e Faino-en-conxunto, a cultura libre e o uso de de tecnoloxías e licenzas libres.

O aRtropocode Galicia 2014 é pois un encontro aberto no que persoas creadoras, investigadoras e activistas se xuntan nun clima de cooperación para compartir coñecementos e desenvolver proxectos transdisciplinares utilizando tecnoloxías e licenzas libres. A participación e asistencia é libre e gratuíta.

A Oficina de Software Libre do CIXUG colabora no patrocinio deste evento, no que estarán presentes os gañadores da pasada edición do Premio ao mellor proxecto fin de carreira, Pablo Belay e Esperanza González.

Novos desafíos abertos para a elaboración da Axenda Dixital de Galicia 2020

Logotipo da Axenda Dixital 2020A Axencia para a Modernización Tecnolóxica de Galicia (Amtega) iniciou o pasado mes de xullo unha campaña de participación social para recoller ideas e suxestións de toda a sociedade galega no proceso de elaboración da Axenda Dixital de Galicia 2020, de forma que a administración autonómica e as partes interesadas formen unha rede social para co-deseñar a nova estratexia tecnolóxica global baseada nun modelo de intelixencia colectiva.

Hoxe publícanse 3 novos desafíos do ámbito da Educación, Empresa e Sector primario, aos que a sociedade pode responder a través dos foros abertos do Blog Xente Dixital ou ben enviando as súas propostas ou suxestións a través do formulario de contacto do blog Xente Dixital: Escríbenos

Por suposto, neste proceso, os axentes do ecosistema do Software Libre e as persoas e colectivos interesados no mesmo, están chamados tamén a colaborar na identificación de iniciativas nas que o Software Libre pode contribuír a acadar os obxectivos dixitais de Galicia 2020.

Formación sobre o xestor de contidos Drupal no CDTIC

Logo de DrupalHoxe, 11 de setembro, desenvolverase no Centro Demostrador TIC o primeiro dos seminarios formativos sobre o xestor de contidos Drupal que se impartirán na sede do CDTIC en Santiago de Compostela. Estes seminarios van dirixidos a profesionais TIC, responsables de xestionar as webs das empresas, ou traballadores autónomos etc. que queiran crear unha páxina web en Drupal ou ben xa administran unha e desexan afondar na súa utilización e na incorporación de máis funcións.

No seminario que comeza hoxe, “Administración básica de Drupal” os asistentes coñecerán os fundamentos de Drupal 7 aprendendo a montalo dende cero e a xestionar unha páxina web utilizando este sistema de xestión de contidos. As prazas para este curso esgotáronse rapidamente, motivo polo que se prevé repetir en Vigo, ao longo do último trimestre do ano, ambos seminarios.

O segundo dos seminarios, “Administración avanzada de Drupal”, celebrarase o vindeiro 1 de outubro en horario de 16.00 a 20.00 horas. Este seminario permitirá aos asistentes afondar na utilización e configuración de Drupal con características avanzadas do sistema.

Publicada a versión final de MiniNo Ártabros 2.1

Imaxe da sección de descargas da Minino 2.1A finais do mes de xullo dabamos conta da publicación da versión candidata da distribución desenvolvida por GALPon, a MiniNo Ártabros 2.1.

Os prazos estimados para converterse en versión definitiva apuntaban a finais do mes de Agosto, e axustados á planificación, a finais do pasado mes, GALPon anunciou no seu portal a nova MiniNo que está xa dispoñible para a súa descarga en dúas edicións, ambas baseadas en Debian 7:

  • Edición MiniNo Ártabros 2.1 «full» para equipos algo máis modernos, capaces de mover ferramentas como LibreOffice e poden ler DVD e/ou USB.

  • Edición MiniNo Ártabros 2.1 «minimal» para equipos con moi poucos recursos e que só poden ler discos CD.

Para quen aínda non a coñeza, GALPon MiniNo é unha distribución GNU/Linux, baseada en Debian, que ten por obxectivo dar solución a computadores moi antigos e con moi poucos recursos.

Nos últimos tempos está a ter un incremento de popularidade pola súa utilidade como reemprazo do sistema operativo Windows XP xa sen mantemento e soporte. Así por exemplo podemos mencionar o caso de éxito na adaptación de MiniNo para a Universidade de Santiago ou a Doazón de equipos antigos da USC ao cárcere de Teixeiro. O uso de MiniNo nestes casos evita ter que realizar inversións en novo hardware, que soporte sistemas operativos máis recentes con necesidades moito maiores de capacidade hardware, así como os gastos asociados ás licenzas de uso asociado a outro sistema operativo privativo.

Obradoiro de Bash scripting

Despois do verán, GALPon retoma o seu ciclo de Sábados Libres na Altamar, esta vez cun curso de Bash scripting, que terá lugar o vindeiro 27 de setembro.

Cun contido maiormente práctico, este obradoiro centrarase na realización de interfaces gráficas con Zenity, Yad e KDE Dialogs. Verase tamén como levar a cabo o proceso de internacionalización(i18n) para facer que os scripts poidan ser traducidos a diferentes idiomas.

Pax. 30 de 327« Primeiro...1020...2829303132...405060...Último »

Pin It on Pinterest