Actualidade

Un total de 577 resultado(s) para Empresa

Hoxe e mañá celébranse no CDTIC sesións formativas para impulsar o comercio electrónico entre as PEMES

Logo do CDTICO Centro Demostrador TIC de Galicia acolle hoxe e mañá catro sesións formativas para impulsar o comercio electrónico entre as PEMES no marco do programa “Vendes en internet?” promovido polo Ministerio de Industria, Enerxía e Turismo en colaboración coa Xunta de Galicia.

Estas sesión formativas que se celebran no CDTIC pretenden dar resposta ás principais dúbidas das empresas cando se inician no comercio electrónico. Desde como pasar do negocio tradicional á venda por internet ata coñecer que é o marketing dixital, de que medios de pagos se dispón ou que barreiras xurídicas existen, entre outras cuestións.

As sesións van orientadas aos autónomos e pequenos empresarios que busquen abrir unha nova canle de negocio a través do e-commerce e tiveron unha acollida espectacular. As prazas esgotáronse aos poucos días de abrir o prazo de inscrición, a pesar de ampliar o aforo inicial co obxectivo de dar resposta á demanda xerada.

Melisa participa nunha campaña de reciclaxe de computadores usados grazas ao software libre

Cartel de difusión do progama de reciclaxeA asociación MeLISA asinará esta semana un convenio de colaboración coa Asociación de Empresarios da Terra de Melide, ASETEM, cuxa finalidade será a de permitir recuperar ordenadores obsoletos grazas á instalación de software libre e poñelos novamente ao servizo de empresas e usuaios que os precisen para a súa actividade diaria. Esta iniciativa busca facilitar o acceso ás novas tecnoloxías, e ao mesmo tempo, difundir o software libre en diferentes ámbitos da comarca.

O proxecto consiste en recoller equipos informáticos vellos, ou que xa quedaran desfasados, para posteriormente proceder á súa revisión e actualización con programas libres, e finalmente poder poñelos a disposición de empresas, traballadores autónomos, ou colectivos sociais que os precisen.

Esta iniciativa está aberta á colaboración de calquera empresa, negocio, asociación, cooperativa, ou particulares que poderá doar de xeito voluntario os equipos que xa non utilicen. O punto de recollida do material está situado na sede de ASETEM, na rúa Lino Sexto Sánchez, en Melide.

Presentación da candidatura do dominio .gal á ICANN

Presentación da candidatura .galHoxe 29 de maio de 2012 ás 12:00 horas, no auditorio da Biblioteca de Galicia na Cidade da Cultura en Santiago de Compostela, terá lugar o acto de presentación da candidatura do dominio .gal, o dominio de Internet de primeiro nivel para a lingua e cultura galegas, que será remitida á ICANN de forma inminente, xa que aínda que o prazo remata mañá 30 de maio, e a asociación puntoGAL xa completou todos os trámites económicos, técnicos e administrativos para a solicitude do .gal.

O acto consistirá nunha mesa redonda que será inaugurada pola directora da Axencia para a Modernización Tecnolóxica de Galicia, Mar Pereira. Nos relatorios participarán, entre outros, representantes da Fudació Puntcat (que xestiona o .cat, o dominio da lingua e cultura catalás), a Secretaría Xeral de Política Lingüística, Consello da Cultura de Galicia, EGANET, Asociación Galega de Editores e Código Cero.

O acto servirá ademais para explicar os prazos do exame da ICANN e as futuras formas de rexistro do .gal.

Software Libre como ferramenta de eficiencia e competitividade para as pemes

Logo do CDTICEste xoves 31 de maio de 9:00 a 14:00 horas celébrase no Centro Demostrador TIC de Galicia unha xornada demostradora que leva por nome Boas Prácticas – Oportunidades e estratexias para crecer coas TIC.

O obxectivo desta xornada é achegar ás empresas galegas tendencias tecnolóxicas que posibiliten a modernización do seu negocio, a mellora do seu posicionamento na economía galega, así como a apertura a novos mercados, todo elo a través dunha metodoloxía que inclúe relatorios prácticos acompañados de casos de éxito.

Como non podía ser doutro xeito se falamos de tecnoloxías para a modernización e eficiencia TIC para as pemes, o Software Libre terá o seu espazo nesta xornada.

Así, xusto a continuación da apertura da xornada, a empresa TEGNIX dará un relatorio sobre Software Libre como ferramenta de eficiencia e competitividade para as pemes a través do que nos achegará a experiencia do proceso de evolución e mellora nas TIC na empresa Cidadanía cara o Software Libre.

Para que os asistentes poidan coñecer non só a visión máis técnica do provedor TIC, senón unha visión máis próxima á propia como empresa consumidora da tecnoloxía, Tegnix estará acompañada de dúas pemes usuarias, que darán conta dos seus casos de éxito: Cidadanía e Sacauntos.

Igalia ofrece prácticas na empresa para o verán do 2012

Logotipo de IgaliaIgalia, empresa galega de Software Libre, infórmanos que por undécimo ano consecutivo ofrece a posibilidade de realizar prácticas na empresa durante os meses do verán, nas súas instalacións de A Coruña ou Pontevedra.

A realización destas prácticas en empresa está aberta a todos aqueles estudantes de Enxeñería Informática ou Enxeñería Técnica en Informática que teñan máis do 50% dos créditos superados.

O período de prácticas realizarase durante os meses de xullo, agosto e setembro, nalgunha das oficinas da empresa, cunha planificación flexible de 5-8 horas diarias ata un total de 350 horas, distribuídas en 325 horas traballando nun proxecto de Software Libre e 25 horas para redactar a memoria. Como contraprestación, Igalia ofrece ademais unha axuda económica de 1.600€.

AGASOL mellorará a liberación de software en Galicia

  • O Centro Nacional de Referencia de Aplicación das TIC baseadas en Fontes Abertas -CENATIC- prestará asesoramento xurídico, tecnolóxico e metodolóxico para o desenvolvemento de negocio baseado en software libre no ámbito galego.
  • O presidente de Agasol, Alejandro Escobar, destacou que “o servizo de consultoría que nos ofrece CENATIC a través deste convenio suporá un incremento da calidade no servizo ás empresas e entidades galegas que escollan software libre”

A Asociación de empresas galegas de software libreAGASOL– asinou o sábado 12 de maio un convenio de colaboración con CENATIC -o Centro Nacional de Referencia de Aplicación das TIC baseadas en Fontes Abertas– polo que AGASOL recibirá asesoramento xurídico, tecnolóxico e metodolóxico para a mellora da liberación do software en Galicia.

 Sinatura do Convenio entre CENATIC e AGASOL

A sinatura tivo lugar no marco da presentación da Plan de Acción de Software Libre 2012 por parte da directora da Axencia para a Modernización Tecnolóxica de Galicia (AMTEGA), Mar Pereira coa presencia da Fundación CENATIC a través do seu director xerente, Miguel Jaque, e AGASOL representada polo seu presidente, Alejandro Escobar.

Oportunidades de negocio baseadas en software libre e ecosistemas open

Cartel do Obradoiro de oportunidades de negocio en software libre

Dentro do programa TICemprende, BIC GALICIA pon en marcha unha serie de obradoiros prácticos nos que se presentan ás empresas TIC da nosa comunidade novas tendencias e oportunidades de negocio que contribúan a orientar os seus procesos de innovación e a afianzar o seu posicionamento no mercado así como un incremento significativo da súa competitividade, a través do emprego de novas técnicas e ferramentas de xestión empresarial.

O 28 de maio de 09:30 a 14:30 e de 16:00 a19:00 horas celebrarase na sede do FEUGA en Santiago de Compostela, o obradoiro Oportunidades de negocio baseadas en software libre e ecosistemas open.

O obradoiro impartirase cunha metodoloxía eminentemente práctica que busca a aplicabilidade do aprendido no posto de traballo e na posta en marcha de accións de mellora nas empresas participantes, cos seguintes obxectivos:

  • Dotar aos asistentes na visión estratéxica necesaria para aproveitar as oportunidades de negocio que ofrece o software libre.
  • Analizar modelos de negocio baseados en software libre.
  • Achegar os coñecementos legais imprescindibles para poder deseñar e aproveitar oportunidades baseadas en software libre.

O programa do obradoiro é o seguinte:

Pensar en software libre é pensar en eficiencia e eficacia

Alejandro Escobar, presidente de AGASOLAlejandro Escobar Díaz, presidente de AGASOL publica un artigo de opinión na sección iMit Opina que reproducimos a continuación.

Pensar en software libre é pensar en eficiencia e eficacia no investimento en tecnoloxías da información: máis e mellores servizos a menor custo

O actual contexto económico está a promover con máis intensidade ca nunca a adopción de solucións que sexan economicamente rendibles, pero que ao mesmo tempo estean preparadas en eficiencia e calidade para competir nun mercado cada vez máis especializado e esixente.

No ámbito do software libre en particular, esta filosofía da eficiencia económica e a calidade do produto é un trazo de identidade que sempre estivo presente, sen agardar á variación do momento económico. Mais é neste momento cando se fai máis visible a idoneidade de “pensar en software libre” á hora de planificar solucións de soporte informático tanto a pequena como a grande escala.

A Asociación de empresas GAlegas de SOftware Libre -AGASOL- vén fortalecendo o tecido empresarial do software libre desenvolvendo proxectos que promoven as tecnoloxías opensource non só como alternativa por economía, senón por adaptabilidade e versatilidade dos produtos, e aplicacións de calidade. Esta promoción do software libre plásmase en catro eixos principais:

  1. a mellora da xestión
  2. a formación
  3. a internacionalización e colaboración internacional empresarial
  4. a aplicación a novos campos (o terceiro sector,…)

Como ferramenta para a mellora da xestión empresarial, AGASOL deseñou un aplicativo web de software libre para a xestión de proxectos -Navalplan- nun estaleiro e en dúas empresas auxiliares. Isto foi posible ao abeiro dun convenio de colaboración que a asociación asinou coa SXMIT, encamiñado á promoción e desenvolvemento do software libre e o uso de estándares abertos en Galicia.

No eido da educación, AGASOL é colaborador imprescindible do proxecto Abalar, que coordina a Consellería de Educación, e que consiste na integración das TIC no eido educativo implementando software libre nos equipos portátiles do alumnado e o profesorado, así como nos servidores dos centros educativos, para o cal é precisa unha constante formación en contidos dixitais, na que tamén participa AGASOL.

Google selecciona o proxecto galego e-cidadania para o Google Summer of Code

Google organiza cada ano o Google Summer of Code, un programa internacional que conta entre os seus obxectivos tanto a integración de estudantes no mundo do desenvolvemento do software libre como colaborar con proxectos libres de interese xeral.

Para isto, nunha primeira fase, Google selecciona de entre todos os proxectos libres que se presentan aqueles de maior interese e nunha segunda fase os estudantes solicitan colaborar nos proxectos que máis lles atraen. Finalmente, feito o emparellamento entre proxectos mentores e estudantes, estes traballarán durante 3 meses, coincidentes co período estival, subvencionados por Google para sacar adiante algunhas das ideas sobres as que traballar no proxecto escollido.

Imaxe da plataforma e-cidadanía

A empresa Cidadanía, membro de AGASOL, presentou o seu proxecto “e-cidadanía” e foi seleccionado entre as 180 organizacións participantes da edición GSOC12.

Para AGASOL, “este é un exemplo da calidade e proxección que está tendo o software libre galego”. O software libre galego terá voz propia, por vez primeira, no programa internacional que Google organiza cada ano marcando un novo fito das TIC galegas da man do software libre. Dende AGASOL felicitaron aos autores do proxecto e á empresa Cidadanía -a última incorporación á lista de socios de AGASOL- polo bo traballo desenvolvido e a senda de futuro aberta con este recoñecemento.

No 2011 triplicouse a contratación de software libre en Galicia

Logotipo de AGASOLSegundo a nota de prensa distribuída por AGASOL, a Asociación de empresas Galegas de Software Libre, esta triplicou o seu volume de negocio durante o último ano.

O crecente incremento da demanda de servizos de software libre en Galicia é xa unha tendencia que está a marcar o proceso de evolución das TIC en todos os seus ámbitos.

AGASOL, que aglutina a día de hoxe a vinte e nove das empresas galegas que traballan con sistemas de código aberto, multiplicou por tres este ano o seu volume de negocio. Segundo o seu xerente, Luis Alberto Fernández, este incremento explícase “debido a que cada vez máis as empresas, as administracións e os distintos actores sociais escollen traballar con programas informáticos libres, que poden ser mellorados e adaptados ás necesidades, ao tempo que adoitan ser gratuítos, e por tanto supoñen un importante aforro económico”.

AGASOL é unha entidade especializada na captación de oportunidades para as empresas de software libre fronte ao software privativo. Neste ano 2011, as empresas desenvolvedoras de software libre melloraron notablemente a súa capacidade de actuación, en parte pola boa resposta que se está obtendo de empresas e particulares que escollen a opción de non ten que pagar polas licenzas do software privativo.

Pax. 30 de 58« Primeiro...1020...2829303132...4050...Último »

Pin It on Pinterest