Actualidade

Un total de 3258 resultado(s) para Outras novas

Open Source nos cursos na Aula de Formación Informática da UDC

Logo da UDCA UDC acaba de abrir os prazos de preinscrición para os cursos de maio que realizarán na Aula de Formación Informática (AFI) da propia universidade.

Como vén sendo xa norma habitual, dentro dos cursos para o mes de maio existe unha nutrida presenza de ferramentas de software libre. Nesta ocasión, ofertaranse prazas para diversos cursos:

  • Programación orientada a obxectos e interfaces gráficas de usuario en Python
  • Boas prácticas na elaboración de documentos ofimáticos con exemplos prácticos en LibreOffice
  • Edición de vídeo con ferramentas libres como Shotcut

Libérase o software de animación 2D OpenTOONZ

OpenTOONZ logotipoDigital Video, os fabricantes de TOONZ, e DWANGO, editorial xaponesa, anunciaron este sábado 26 de marzo no Anime Japan de Tokio a materialización do acordo asinado por ambas partes para a adquisición e liberación como Open Source do software de animación TOONZ, software de animación que foi desenvolvido orixinalmente por Digital Video de xeito independente. Digital Video e DWANGO chegaron a ese acordo baixo a condición de que DWANGO publicase e desenvolvera dito software baixo unha plataforma de código aberto baseada en TOONZ que se chamaría OpenTOONZ.

A materialización desta liberación chegou este sábado coa publicación dos fontes do código na plataforma de xestión de proxectos Github.com. Así pois OpenTOONZ xa está accesible dende o sábado baixo licenza BSDv3 compatible coa licenza GPL de GNU.

GPUL organiza un hackatón de IoT dentro das súas actividades dos GPUL Labs

Logo GPUL LabsA asociación GPUL segue coas activades dos seus GPUL Labs, que están a ter unha grande acollida ata o momento.

Ademais de anunciar que xa teñen unha nova remesa de actividades para as vindeiras citas, informan de que van a celebrar un Hackatón de desenvolvemento sobre IoT na cidade da Coruña, no que os asistentes desenvolverán pequenos prototipos baseados en software e hardware libre durante un día completo de traballo colaborativo.

Segundo nos indican a entrada será de balde, e os asistentes disporán de hardware para desenvolver o seu proxecto como Raspberrys, Arduinos e sensores para facer probas, ademais de almorzo e comida a cargo da organización, todo co obxectivo de facer piña e crear unha comunidade de desenvolvedores preocupados polas tecnoloxías libres que impulsen proxectos de código aberto.

A empresa iCarto organiza un obradoiro de OpenStreetMap e un mapatón humanitario

Obradoiro OSMO vindeiro venres 8 de abril, en colaboración co Laboratorio de Cartografía da Universidade da Coruña (CartoLab), a empresa galega iCarto organiza un obradoiro de introdución a OpenStreetMap xunto con un mapatón humanitario dunha rexión de Mozambique.

iCarto vén traballando dende fai varios anos na rexión norte de Mozambique en proxectos de Cooperación para o Desenvolvemento a través das convocatorias de Cooperación Galega (Xunta de Galicia). Estes proxectos teñen por obxectivo o fortalecemento institucional da Administración Rexional de Augas do Norte de Mozambique (ARA-Norte) a través do emprego de tecnoloxías de información xeográfica de Software Libre.

A xornada do 8 de abril terá dúas partes diferenciadas, pola maña presentarase o traballo que iCarto está levando a cabo en Mozambique e farase un obradoiro de introdución a OpenStreetMap, para aquelas persoas que queiran coñecer e empezar a colaborar con este proxecto. Xa pola tarde farase un mapatón humanitario, que consiste en traballar con OpenStreetMap creando cartografía en Mozambique que será empregada para poder facer un estudo de riscos de inundacións, polo que o mapatón centrarase no mapeado de elementos vulnerables como vivendas ou infraestruturas.

Nova convocatoria para a obtención da certificación galega en competencias dixitais

  • As probas presenciais celebraranse os días 27, 28 e 29 de abril nas aulas CeMIT de 31 concellos de toda Galicia
  • Os interesados poden inscribirse a través da web da Rede CeMIT
  • Están orientadas a aquelas persoas que xa posúen os coñecementos necesarios ou que optan pola modalidade autoformativa
  • Este certificado, que emite a Axencia para a Modernización Tecnolóxica de Galicia, acredita a formación nesta materia da persoa titular ante calquera instancia pública ou privada

Logo do CODIXA Axencia para a Modernización Tecnolóxica de Galicia (Amtega) convoca preto de 500 prazas de avaliación para a obtención da certificación galega en competencias dixitais en ofimática (CODIX). Esta convocatoria, publicada onte no DOG, está orientada a aquelas persoas que xa posúen os coñecementos necesarios das aplicacións informáticas que compoñen o módulo formativo MF0233_2 «Ofimática» baixo o paquete de LibreOffice.

A inscrición poderá realizarse desde mañá a través de web da Rede CeMIT sendo o único requisito o de ser usuario/a da rede CeMIT. No caso de que existan máis solicitantes que prazas convocadas, realizarase un sorteo alfabético entre as persoas inscritas para establecer a orde de prelación para poder efectuar a matrícula.

Publicado novo artigo sobre Sistemas de Información Xeográfica con Software Libre

Logo gvSIGDentro da sección de Artigos Tecnolóxicos, orientados a mostrar solucións de Software Libre que poidan ser de interese para as empresas, vimos de publicar un artigo adicado aos Sistemas de Información Xeográfica, onde analizamos a ferramenta gvSIG.

A capacidade de facer análises tendo en conta a compoñente xeográfica da información aporta un valor moi grande á mesma e achega novas posibilidades de xestionar a mesma. Os sistemas de información xeográfica aportan xeitos diferentes de analizar a información e permiten facer análises dende outra perspectiva.

Visto cun exemplo podemos darnos conta do que nos aportan. Imaxinemos unha empresa de transporte onde un repartidor vai iniciar a súa xornada. Ter unha lista cos nomes dos sitios aos que ten que ir, implica que se quere optimizar o seu percorrido, precisa dun coñecemento previo de como de preto están entre si todos eses lugares. A mesma información posta sobre un mapa permitiríalle dunha soa ollada obter ese percorrido óptimo.

Celebración do Arduino Day en Lugo

Por terceiro ano consecutivo Lugo unirase á festa de celebración polo aniversario de Arduino durante o Genuino/Arduino Day.

A asociación makers.lugo organiza un ano máis un evento aberto para todos os públicos o sábado día 2 deste próximo mes de Abril. O obxectivo é xuntarse nese día para celebrar con outros makers e dar a coñecer distintos proxectos feitos con arduino ao público xeral, polo que dende a organización desexan contar co maior número posible de persoas! Ademais, segundo nos informa a organización, queren aproveitar este evento mundial para medrar e situar tamén a Lugo no mapa do hardware e o software libre.

A Asociación GHANDALF publica unha nova web do libro Máster Software Libro, ano II

Libro Máster Software Libre, Ano IIA Asociación GHANDALF publicou a pasada semana unha nova web para a difusión do libro Máster en Software Libre, ano II. Este libro editado pola propia asociación recolle as teses de fin de mestrado dos estudiantes da segunda edición do Máster en Software Libre, traducidas ao Galego.

Esta publicación únese as que xa ten tamén publicadas a asociación, Máster Software Libre, ano I e Creando Software Libre, unha traducion dun dos libros de referencia sobre xestión de proxectos de Software Libre. Estas publicacións son froito da aposta que a Asociación GHANDALF fai polo desenvolvemento de actividades que permitan compartir coñecemento en materia de Software Libre na nosa lingua.

Novo artigo tecnolóxico: Alfresco, xestión documental con software libre

Logo de Alfresco e a empresa Queres TencoloxíaVimos de publicar un novo artigo sobre outra solución de xestión empresarial. Desta volta trátase de Alfresco, solución para a xestión documental empresarial con Software Libre.

Todas as organizacións, independentemente do seu tamaño, xeran diariamente importantes cantidades de información e documentación, moita dela de vital importancia para o bo funcionamento da empresa: contratos, propostas, presupostos, acordos, fichas técnicas, etc.

Unha boa pregunta para saber se unha solución de xestión documental podería axudar a mellorar a eficacia da xestión da miña empresa é: “Podo atopar facilmente a información e datos que preciso para xestionar o meu negocio?” Se a resposta é non sen dúbida o artigo será do seu interese.

Na actualidade existen numerosas solucións para a Xestión documental tanto privativas como libres, mais neste artigo centrámonos nas solucións libres, polas vantaxes que supoñen, e concretamente na solución Alfresco.

Por outra parte, dada a importancia da existencia de provedores tecnolóxicos próximos e de confianza á hora de abordar a implantación dunha nova solución TIC, falamos con Queres Tecnologías, empresa galega provedora de Alfresco, tendo a través das súas respostas unha visión especializada da solución presentada.

Novo artigo tecnolóxico sobre o caso de éxito de OpenESB na Xunta de Galicia

Logo de OpenESBHai uns días publicamos na sección de Artigos Tecnolóxicos un caso de éxito de uso de OpenESB na Xunta de Galicia.

Neste artigo, ademais de mostrar o caso de éxito e como se está a empregar esta solución de software libre na Xunta de Galicia, entrevistamos a:

  • Paul Perez, cabeza visible da comunidade internacional de software libre que desenvolve OpenESB.
  • Alejandro Casas, Xerente de proxectos de Traballo e Emprego na Área de Solucións Tecnolóxicas Sectoriais da AMTEGA, quen é o responsable do proxecto de integración de OpenESB na Xunta de Galicia.
Pax. 20 de 326« Primeiro...10...1819202122...304050...Último »

Pin It on Pinterest