Actualidade

Un total de 544 resultado(s) para Empresa

As empresas galegas de 10 ou máis traballadores á cabeza do Estado no uso do software libre

  • Tres de cada catro empresas de Galicia con 10 ou máis asalariados emprega sistemas operativos libres, 3,9 puntos por riba da media estatal, mentres que nas microempresas a porcentaxe sitúase nun 44,3%
  • Os programas libres con maior implantación son os navegadores de internet e as aplicacións ofimáticas
  • En canto ás empresas informáticas, máis do 84% empregan este tipo de software
  • No último ano incrementouse en máis de 5 puntos a porcentaxe de empresas informáticas que venden servidores de correo, sistemas de xestión de bases de datos e sistemas operativos libres
  • As empresas informáticas galegas perciben o software libre como un posible nicho de mercado e máis da metade considera que a súa tendencia o mercado será expansiva

Tres de cada catro empresas de Galicia con 10 ou máis asalariados emprega software libre, 3,4 puntos por riba da media estatal, o que sitúa a Galicia no primeiro posto das Comunidades Autónomas neste ránking. No caso das microempresas a porcentaxe sitúase nun 44,3%.

Son datos recollidos nos estudos sobre “O uso de Software libre nas empresas e no sector TIC de Galicia. Ano 2013”, publicados polo Observatorio da Sociedade da Información e a Modernización de Galicia (OSIMGA), adscrito á Axencia para a Modernización Tecnolóxica de Galicia (Amtega). A elaboración destes informes enmárcase nos compromisos asumidos no marco das actuacións do Plan de Acción Software Libre 2013.

Novos obradoiros de prestashop e dolibarrERP na aula TIC Pemes da USC

A Aula TIC Pemes da USC oferta dous novos cursos a través da súa plataforma de teleformación; VI Edición do obradoiro virtual de Xestión de Tendas Virtuais, baseado na ferramenta de software libre Prestashop e III Edición do obradoiro virtual sobre Planificación de Recursos Empresariais baseado no ERP con licenza libre DolibarrERP .

Banner do curso de Prestashop

Ambos cursos terán unha duración de 50 horas cada un, comezando o 29 de marzo e rematando o 7 e o 14 de maio respectivamente.

Curso de online de NavTable sobre gvSIG 1.12

Cartolab informa que están a organizar, en colaboración coa Fundación Universidade da Coruña, diferentes cursos online sobre os SIX a desenvolver nos próximos meses que comezan xa cun curso de NavTable.

Cartel do curso sobre NAvTableNavTable é unha extensión para gvSIG desenvolvida por Cartolab no ano 2009 que facilita o traballo cos datos alfanuméricos asociados ás capas vectoriais. Segundo a información ofrecida por Cartolab, o éxito de acollida entre a comunidade de usuarios impulsounos a desenvolver novas funcionalidades e mesmo unha biblioteca propia para xerar formularios personalizados.

Este curso é sen dúbida unha excelente oportunidade para todos aqueles que teñen que traballar con gvsig para coñecer o funcionamento e potencial desta extensión da man dos seus creadores.

Lista de correo para a comunidade interesada no LPIC en Galicia

Logo de LPIEn resposta á petición recibida por parte de usuarios do portal mancomun, a semana pasada creouse unha nova lista de correo, lpic-gal co obxectivo de servir de canle de comunicación entre as persoas certificadas ou interesadas en certificarse en administración de sistemas GNU/Linux ofertadas polo LPI

Segundo nos informou Rafael Rodríguez, presidente de Melisa, a idea xurdía entre os asistentes ao último dos cursos de preparación para a certificación LPIC impartido no CNTG, co obxectivo de servir de punto de encontro entre a comunidade galega interesada nestas certificacións.

Así esta lista permitirá que os asistentes aos diferentes cursos de preparación da certificación LPIC poidan compartir experiencias na certificación, dúbidas sobre os exames, enviar consultas, ofertas de traballo, etc. En resumo disporán dunha canle onde poder estar en contacto e tratar calquera tema de interese en torno á formación en administración de sistemas GNU/Linux en xeral e concretamente en torno á certificación LPIC. A lista vai ser administrada pola Asociación de Usuarios de Software Libre da Terra de Melide (MeLiSA).

Curso de Drupal 7 avanzado organizado polo CPEIG

Logo do CPEIGO CPEIG organiza o curso Drupal 7 avanzado dirixido a desenvolvedores web con coñecementos básicos de Drupal que requiran implementar proxectos web complexos con Drupal 7, xa sexa para terceiros ou para emprender cunha idea de negocio propia. O obxectivo do mesmo é que o alumnado ao final do curso poida desenvolver tendas de eCommerce e Redes Sociais sobre Drupal, así como realizar tarefas de optimización do rendemento de portais baseados en Drupal. Logo de drupal

O curso terá unha duración de 20 horas presenciais que se distribuirán en 4 sesións intensivas os venres pola tarde e sábados pola mañá durnte dous fins de semana do mes de marzo, 21 e 22 de marzo e 28 e 29 de marzo. O horario será de 16:00 á 21:00 os venres e de 09:00 á 14:00 os sábados.

A metodoloxía da acción formativa é totalmente práctica, onde o alumno, desde a primeira lección, crea un portal a través dos exercicios propostos. As sesións presenciais acompañaranse pois con exercicios e prácticas, así como cun dossier formativo con actividades adicionais para que este curso sirva de punto de inicio no desenvolvemento de sistemas web complexos en Drupal, como son tendas de eCommerce e Redes sociais.

Encontro de desenvolvedores de Eneboo ERP

Logotipo de Eneboo ERPMañá comeza na Coruña o Eneboo Summit 2014, o II encontro de desenvolvedores do ERP Eneboo.

Este encontro é organizado pola empresa Ítaca Software Libre e celébrase na aula de formación da OSL do CIXUG sita no Edificio de servizos centrais de investigación da Universidade da Coruña durante os vindeiros 20 e 21 de febreiro.

Os obxectivos deste encontro de desenvolvedores, como soe ser habitual, son a posta en común entre os diferentes partners de Eneboo das perspectivas de futuro a curto prazo do software que están desenvolvendo, a posta en común de experiencias e solucións, o estudo de liñas de comercialización de solucións para empresas…

Entre as empresas que asistirán a este encontro, ademais da organizadora Ítaca Software Libre, están Aulla Sistemas, Calidae, Bedooin Tech Ventures, KLO Ingeniería Informática S.L., Gestiweb Integraciones Web S.L., ou Itecnopartner.

Obradoiro virtual de Prestashop ofrecido pola aula TIC PyMES da USC

A Aula TIC Pemes da USC oferta a V Edición do obradoiro virtual de Xestión de Tendas Virtuais, baseado na ferramenta de software libre Prestashop.

Cartel do obradoiro de PrestashopO curso terá unha duración de 50 horas, entre o 1 de febreiro e o 12 de marzo, cun carácter eminentemente práctico e celebrarse a través da plataforma en liña da Aula TIC. O curso ten un custe de 100 euros, que se reduce a 60€ para alumnado da USC e unha vez superado, emitirase un certificado acreditativo da Aula TIC PYMEs da USC.

O curso está dirixido tanto a profesionais autónomos e pemes como a público en xeral. O contido do curso incluirá a instalación, posta en marcha da aplicación, a administración dos clientes e empregados, a manipulación do catálogo de produtos, a xestión dos pedidos e pagos, así como a análise estatística dos datos entre outras ferramentas. O obxectivo do mesmo é capacitar ao alumnado para ser quen de poñer en marcha unha tenda virtual, personalizala e xestionala de forma económica, de forma que introducirse no comercio electrónico non supoña un problema para as empresas e autónomos.

Mañá comeza a Open Source Hardware Demonstration (OSHWDEM-13) no centro Ágora de A Coruña

Imaxe da OSHWDEM-13Como vos anunciamos hai unhas semanas, os días 30 de novembro e 1 de decembro terá lugar Centro Cultural Ágora de A Coruña a segunda edición da Open Source Hardware Demonstration organizada por Bricolabs e a asociación Ghandalf.

O programa xa está pechado, e conta con relatorios, obradoiros, espazos de demostración e concursos.

A inscrición para os obradoiros abriuse onte mesmo. Todos eles teñen prazas limitadas para garantir a calidade e interactividade das actividades. A adxudicación de prazas realizarase por rigorosa orde de inscrición. Dende a organización solicitan que só se inscriban se están seguros de poder asistir ao obradoiro, e que se teña conta de non apuntarse a obradoiros co mesmo horario.

Por suposto, ademais dos obradoiros hai moitas outras actividades interesantes durante toda a fin de semana. Se queres asistir aínda estás a tempo de te inscribir como asistente.

Nova edición do Concurso de Proxectos Tecnolóxicos da ESEI e Expourense

Banner do concurso de proxectos tecnolóxicosA Escola Superior de Enxeñaría Informática do campus de Ourense e Expourense veñen de presentar unha nova edición do Concurso de Proxectos Tecnolóxicos co que pretenden vencellar as actividades de I+D+i da Universidade no eido das TIC co mundo empresarial, sensibilizando por unha parte ás empresas das vantaxes da innovación e a investigación relacionadas coas TIC para o aumento da produtividade e da competitividade e por outra parte estimulando a capacidade innovadora do alumnado para desenvolver proxectos cunha visión empresarial.

Así a organización desta XII edición do certame convida un ano máis ao alumnado das titulacións de tecnoloxías da información e as comunicacións das universidades da Eurorrexión Galicia-Norte de Portugal a presentar os seus traballos fin de estudos máis innovadores.

O xurado par a concesión dos premios terá en conta a calidade do proxecto, a orixinalidade, a dificultade, a aplicabilidade social, a orientación cara a innovación empresarial así como se hai desenvolvemento de software libre no proxecto.

Tegnix crea unha nova Rede social profesional sobre Software Libre

Tegnix, da que vos falamos a pasada semana pola súa participación na iniciativa Wikiskills, volve ser noticia, desta volta pola creación e apertura da Rede Social Profesional sobre Software Libre.

Imaxe da rede social de TegnixSegundo anuncian os creadores desta rede social, o obxectivo da mesma é proporcionar aos profesionais e interesados no software libre un espazo de encontro, de comunicación e colaboración onde intercambiar ideas, propostas, recursos, actividades, iniciativas, etc.

Segundo nos conta Roberto Brenlla, aínda que a rede nace como complemento a Aula Tegnix, para favorecer outros tipos de aprendizaxe, especificamente a non formal e a informal, trátase dunha rede social aberta ao público en xeral, co único requisito de compartir información e coñecementos sobre Software Libre fundamentalmente de carácter profesional.

Pax. 20 de 55« Primeiro...10...1819202122...304050...Último »

Pin It on Pinterest