Actualidade

Mozilla acaba de liberar unha nova ferramenta libre que permite de forma sinxela comprobar e verificar a seguridade dos sitios web. A ferramenta foi bautizada co nome de Observatory. Este novo produto usa unha sinxela gradación dos sistemas para devolver un informe acerca das áreas de seguridade que se poden mellorar.

Orixinalmente desenvolvido como unha ferramenta de probas internas para Mozilla, Mozilla Observatory xa se empregou para verificar a seguridade de máis dun millón de websites. Como curiosidade, Mozilla destaca que preto dun 91% destes sitios comprobados aínda seguen carecendo das últimas e máis modernas vantaxes de seguridade.

O código de Observatory pódese atopar en GitHub baixo os termos da Mozilla Public License v2.0. Unha versión online da mesma tamén está dispoñible para o seu uso nesta ligazón.

Segundo o xa anunciado por parte da EU-FOSSA (EU Open Source Software Auditing) a ferramenta KeePass foi seleccionada para ser revisada e mellorada como proxecto piloto para detectar posibles problemas de seguridade.

Este traballo está a piques de comenzar, polo que a FOSSA fai un chamamento á comunidade para participar na contribución a KeePass nesta primeira etapa do proxecto.

O equipo de KeePass traballará na revisión xunto coas partes interesadas, polo que pode ser bo momento para iniciar a contribución ao proxecto. Para todos os interesados, a FOSSA pon a disposición a dirección DIGIT-OSS-STRATEGY@ec.europa.eu.

A evolución da revisión de código pódese seguir mediante a consulta das actualizacións publicadas pola Comunidade FOSSA UE, baixo a páxina de rexistro de revisión de código.

O piloto proposto pola FOSSA ten intención de dar un enfoque sistemático paras institucións da UE para asegurarse de que os compoñentes clave de código aberto amplamente utilizados poidan ser de confianza. O proxecto tamén establecerá nun futuro un modo operativo no que as institucións da UE contribúan á integridade e seguridade, clave no software de código aberto.

Máis información na web do Proxecto da UE-FOSSA.

Dentro da sección de Experiencias TIC do Centro Demostrador TIC (CDTIC), no que se están a mostrar en forma de vídeos diferentes experiencias de transformación dixital en empresas pertencentes a diversos sectores non relacionados directamente coas tecnoloxías da información e das comunicacións, hoxe queremos destacar o caso de Gladex Placotec, por apostar pola implantación dunha tecnoloxía de software libre, OwnCloud.

Sobre a solución OwnCloud temos xa falado anteriormente en Mancomún e mesmo elaboramos un artigo completo sobre esta solución, no que entrevistamos a varias empresas galegas relacionadas con esta solución dende diferentes puntos de vista, o de empresa tecnolóxica que fornece servizos sobre OwnCloud e o de empresa que implantan a solución como usuaria.

No caso que destacamos hoxe, Gadiex Placotec S.L., trátase dunha empresa de Vigo que se dedica ao illamento e tabiquería seca de distribución, que implantou OwnCloud como ferramenta para mellorar a coordinación do seu persoal e delegacións.

A Linux Foundation abre o prazo de inscrición para os cursos de seguridade LFS216 que ela mesma oferta orientados a seguridade en contornos Linux. Os cursos son online e tocan temas específicos de seguridade en Internet en sistemas Linux.

Este tipo de cursos están recomendados para calquera persoa involucrada en tarefas de seguridade intermedia. Están enfocados á compresión das configuracións básicas dos compoñentes de seguridade en Linux e ás solucións provistas por Linux Security en calquera nivel de seguridade.

O goberno austríaco concederá ata 200.000 euros para proxectos de código aberto sobre eGovernent, eHealth, eLearning, eInclusion, ou produtos e servizos comerciais. Segundo Muna Duzdar, Secretario de Estado de Dixitalización austríaco o "Open source ten efectos macroeconómicos positivos, mellorando as posibilidades de uso e desenvolvemento", explica nun comunicado para a prensa.

A Dirección Tecnolóxica da Información e as Comunicacións (DTIC) acaba de publicar a Guía Dixitalíza-T unha guía para facilitar ás Entidades Locais o cumprimento das obrigas dixitais das Leis 39 e 40/2015 e o das ferramentas tecnolóxicas da DTIC.

Esta lei supón un forte impulso á dixitalización das Administracións públicas españolas que establece varias obrigas en torno á Administración electrónica que propician unha maior eficacia, innovación e modernización.

¡Dixitalíza-t! Preséntase como a guía para facilitar o cumprimento por parte das Entidades Locais das novas obrigas, a través das ferramentas tecnolóxicas que poñen a súa disposición a Dirección de Tecnoloxías da Información e as Comunicacións (DTIC).

Logo de moitos anos, finalmente vislúmbrase a luz ao final do túnel. Firefox vén de anunciar que incluirá en breve á FNMT (Fábrica Nacional de Moeda e Timbre de España) na súa base de entidades certificadores recoñecidas. É dicir que o navegador Firefox recoñecerá automaticamente que os sitios web das sedes electrónicas da administración pública española son sitios seguros e confiables sen necesidade de realizar complexos pasos previos de instalación manual de certificados.

Deixaremos de ver por fin o aviso inicial de "sitio non seguro" ao acceder por primeira vez á calquera sede electrónica española se non temos engadido o certificado raíz da FNMT ou se non temos engadida unha excepción.

Deste modo, Mozilla Firefox converterase no primeiro navegador web libre con soporte para a autoridade certificadora dixital da FNMT dándolle vantaxe de uso nos portais web da administración. 

Sen dúbida unha excelente nova para o software libre e para o avance da administración electrónica en España.

O sistema operativo Linux chega aos 25 anos de idade estes días. Foi un 25 de Agosto do ano 1991 cando Linus Torvals, daquela un simple estudante de Ciencias da Computación en Helsinki, anunciou ao mundo Linux a publicación de “un sistema operativo libre, só por afección, que non será tan grande é profesional coma GNU pero que servirá para ordenadores 386”.

Dende aquel anuncio ata hoxe, este sistema operativo, creado inicialmente como un pasatempo, acadou unha penetración e uso inimaxinables polo seu autor chegando a ser o sistema operativo hexemónico en moitas das areas da computación actual.

Así amosaba a súa visión actual o mesmo Linus Torvals na pasada Embedded Linux Conference: “Hoxe podes usar o teléfono Linux para conectarte a un datacenter baseado en Linux a través dun router tamén baseado en Linux para que unha intelixencia artificial che axude a elixir que dispositivo baseado en Linux mercar a continuación”.

O Concello de Celanova acaba de publicar os datos do balance do que foi o ano 2015 para a aula CeMIT (Centro para a Modernización e Inclusión Tecnolóxica) do mesmo concello integrada na Rede CeMIT de Galicia.

O resultado do peche do ano 2015 cun total de 112 novos usuarios na Aula CeMIT de Celanova, que sumados aos existentes, fan un total de 825. A análise dos datos tamén amosa un maior uso por parte de mulleres, 58% en fronte do 42% en homes. A media de idade dos usuarios da aula é de 43 anos, e cuns porcentaxes de coñecementos do 32% sen coñecementos, un 30% con coñecementos moi básicos e xa nun 35% con coñecementos a nivel usuario e só un 3% usuarios con coñecementos avanzados.

A plataforma de goberno electrónico Pléiade foi liberada como software libre pola asociación francesa de municipios e-Collectivités Vendée, que integra centos de usuarios desta solución. Con esta publicación queren potenciar a súa reutilización por parte doutras administracións, que ademais poidan colaborar no seu desenvolvemento e mellora.

Pléiade é unha solución web, despregada a través de servidores con GNU/Linux e que está formada por unha pila de solucións de software libre. A páxina base está construída sobre Drupal, inclúe Alfresco como xestor da documentación, unha solución libre de sinatura electrónica, iParapeur, transmisión de ficheiros con FileZ e un bus de servizos, soportando tamén a autenticación centralizada mediante OpenLDAP.

Aínda que acaba de ser liberada, a solución é madura e fiable, xa que leva en produción dende o ano 2014, sendo empregada por un total de 213 municipios e 133 empresas de xestión municipal.