Actualidade

Un total de 581 resultado(s) para Educación

A Amtega publica con licenza libre os materiais formativos para obter a Certificación galega de Competencias Dixitais en Ofimática

  • A Amtega publica con licenza libre e en formatos abertos os materiais formativos para a obtención das competencias definidas no CODIX
  • Os obxectivos desta publicación son achegar novas formas de formación á cidadanía e permitir que outros centros ou entidades formativas poidan empregar estes materiais
  • Dende o pasado 30 de outubro xa se pode acceder ao programa de autoformación para adquirir ditas competencias a través da plataforma EMA da rede CeMIT

Imaxe das portadas das unidades formativas publicadas

A Axencia para a Modernización Tecnolóxica de Galicia (Amtega) vén de publicar no Repositorio Documental de Software Libre os materiais formativos que compoñen o programa de autoformación para obter a Certificación galega de Competencias Dixitais en Ofimática, CODIX, na súa modalidade de Software Libre, é dicir, baseándose no uso do sistema operativo GNU/Linux e a suite ofimática LibreOffice. Os materiais publícanse con licenza libre (CC-by-sa) e en formatos abertos (pdf, epub, SCORM e tamén en formato elp de exelearning).

O CODIX é unha certificación que acredita que a persoa titular conta coas capacidades, destrezas e coñecementos en ofimática definidos no Plan formativo ofimático de Galicia.

Este programa pode seguirse na modalidade de autoformación a través do Espazo Multimedia de Aprendizaxe (EMA) da Rede CeMIT co único requisito de ser usuario rexistrado maior de 16 anos.

Nova versión de GALPon MiniNo PicarOS

Logo de PicarosSe a comezos do pasado mes de setembro informabamos da publicación da nova versión de MiniNo Ártabros con numerosas novidades, desta volta a protagonista é MiniNo Picaros, a adaptación para os máis cativos da casa. Así a comezos deste mes de outubro, o equipo de desenvolvemento de MiniNo anunciaba a nova versión MiniNo Picaros Diego 2014.

Apenas 15 días despois do lanzamento, segundo a información facilitada polos desenvolvedores, xa levan máis de 2.000 descargas.

Entre as novidades desta nova Picaros, o equipo informa que traballaron a prol de facerlle a vida un chisco máis cómoda aos mestres e mestras de Primaria ademais de axustar os programas a este nivel educativo e preparalos para o uso na aula ou na casa.

Destacar por exemplo a inclusión de numerosas utilidades e aplicativos para o uso dos Encerados Dixitais Interactivos, inclusión de novos xogos para os máis pequenos, inclusión de aplicativos para facilitar a lectura de nenos con problemas de dislexia, novos programas específicos para as áreas de música ou inglés, etc a maior parte deles a petición de mestres que veñen empregando xa esta distribución nas súas aulas e comunican as súas necesidades e desexos aos desenvolvedores.

Vreixo González e Iago Veloso gañadores do Premio ao mellor PFC con licenza libre

  • O gañador foi Vreixo González Caneda polo proxecto “Aplicativo de cálculo de rutas en transporte público con software libre”
  • O gañador do segundo premio foi Iago Veloso Abalo polo proxecto “ Sistema de grabación automática da emisión en directo dunha emisora de radio comunitaria con Software Libre”
  • Esta edición destacou pola alta participación con 15 proxectos inscritos
  • Esta iniciativa enmárcase no Plan de Software Libre 2014 da Xunta para mellorar e potenciar a formación e difusión do software de fontes abertas entre a cidadanía

Este venres 17 de outubro tivo lugar o acto de defensa dos 5 finalistas da VII edición do Premio ao mellor Proxecto de Fin de Carreira con Licenza Libre tralo cal procedeuse a dar a coñecer o fallo do xurado.

Gañadores da VI edición do Premio ao mellor PFC con licenza libreA Axencia para a Modernización Tecnolóxica de Galicia (Amtega) concedeu o Premio ao Mellor Proxecto Fin de Carreira con Licenza Libre a Vreixo González Caneda da Universidade da Coruña polo proxecto “Aplicativo de cálculo de rutas en transporte público con software libre” consistente no desenvolvemento dun aplicativo para o sistema operativo Android, que ofrece cálculo multimodal de rutas en distintos medios de transporte publico, a pé e en bicicleta co obxectivo de servir de ferramenta de busca das mellores rutas. Este recoñecemento ten unha dotación económica de 1.500 euros achegada polo CIXUG ao abeiro do Convenio de colaboración asinado coa AMTEGA.

Ademais, concedeuse tamén un segundo premio a Iago Veloso Abalo polo proxecto “ Sistema de grabación automática da emisión en directo dunha emisora de radio comunitaria con Software Libre” consistente nunha aplicativo web para a xestión da programación dunha radio comunitaria, así como dun sistema de gravación e publicación automática das emisións, cunha dotación económica de 750€ achegados pola Asociación GPUL, colaboradora da iniciativa ao abeiro do convenio de colaboración asinado coa AMTEGA.

A asociación GHANDALF achega o software libre a máis de 250 alumnos da ESO e ciclos superiores

Logo da asociación GhandalfSegundo nos informan dende a asociación Ghandalf, durante estas últimas semanas máis de 250 alumnos pertencentes a diferentes niveis da ESO e de ciclos superiores, así como tamén algúns profesores dos centros implicados, recibiron por parte da asociación GHANDALF unha serie de charlas formativas en materia de software libre.

O pasado día 1 de outubro, no CPI Alcalde Xosé Pichel de Coristanco, tivo lugar a primeira destas charlas, na que arredor de 100 alumnos de 1º e 2º da ESO, así como parte do profesorado do centro, recibiron unha charla de introdución ao software libre. Nesta sesión os asistentes tiveron a oportunidade de descubrir que é o software libre, como se obtén, que vantaxes achega e mesmo darse conta de que o estaban a empregar a diario sen ser conscientes dilo. Na segunda parte da charla viron exemplos de ferramentas libres que se poden empregar para as tarefas máis habituais como pode ser a ofimática, navegación por internet, retoque fotográfico, xogos, etc.

Por outra banda, no IES Xulián Magariños de Negreira, onte mesmo, tiveron lugar outras dúas sesións, nas que participaron máis de 150 persoas en total.

Finalistas para o Premio ao mellor PFC con licenza libre

O vindeiro venres 17 de outubro a partir das 16:00 horas terá lugar o acto de entrega da VII edición do Premio ao mellor Proxecto de Fin de Carreira con Software Libre que convoca a Axencia para a Modernización Tecnolóxica de Galicia (Amtega) coa colaboración da Oficina de Software Libre do CIXUG. O acto celebrarase na Sala Eisenman da Cidade da Cultura.Imaxe do premio

O pasado 30 de setembro rematou o prazo de presentación de candidatos ao premio, cun récord histórico de participación.

Recibíronse un total de 15 inscricións, completando 14 candidatos todos os pasos requiridos para a participación. Cómpre destacar ademais da cantidade, a variedade de áreas e a calidade de todos eles, habendo por primeira vez dous proxectos que, ademais de desenvolvemento de software publicado con licenza libre, empregaron tamén hardware libre.

Con estes datos, podedes imaxinar que a tarefa do xurado para a elección dos finalistas non foi un traballo doado. Segundo se recollía nas bases, ademais da calidade técnica dos traballos, o xurado valorou especialmente o correcto licenciamento dos proxectos así como o uso de metodoloxía de traballo propia dos desenvolvementos en aberto.

Remata o prazo de inscrición para a formación en bases de datos NoSQL e MongoDB no CNTG

Logotipo de MongoBD

Como xa informamos o pasado mes, o Centro de Novas Tecnoloxías de Galicia (CNTG) incorpora por primeira vez na súa oferta formativa formación sobre bases de datos NoSQL e MongoDB:

O 25 de setembro finaliza o prazo para inscribirse no curso “Administración e desenvolvemento de bases de datos MongoDB”, que inclúe a posibilidade de realizar, ao finalizar o mesmo, dous exames de certificación: MongoDB certified DBA associate e MongoDB certified developer.

Aquelas persoas que non teñan claro se é un curso do seu interese, poderán tirar proveito do seminario técnico sobre bases de datos NoSQL e MongoDB, do vindeiro día 23 de setembro. É posible inscribirse neste seminario ata o día 22, estando limitada a asistencia sen inscrición á dispoñibilidade de aforo.

Seminario técnico sobre bases de datos NoSQL e MongoDB

O Centro de Novas Tecnoloxías de Galicia (CNTG) organiza para o vindeiro martes 23 de setembro un seminario técnico sobre bases de datos NoSQL e MongoDB.

Banner do portal de MonogoDB

O obxectivo do seminario é dar a coñecer ao público asistente as características técnicas, potencialidade e usos das bases de datos NoSQL, centrándose fundamentalmente en MongoDB, unha base de datos NoSQL orientada a documentos, multiplataforma, open source e gratuíta cunha estreita relación co concepto de Big Data.

O seminario celebrarase en horario de mañá, de 9:30 a 13:30 horas, no salón de actos do propio CNTG, e correrá a cargo de Sergio Rodríguez, director de formación da empresa Core Networks e instrutor oficial de Cloudera, con varias certificacións Hadoop e colaborador habitual en xornadas sobre Big Data.

Novos cursos de Software Libre no CNTG: LPIC, MongoDB e Seguridade

Logo de LPILogo de MongoDBHoxe abre o prazo de inscrición para anotarse aos primeiros cursos do avance da programación do último cuadrimestre do ano do CNTG. Estes cursos comezarán a impartirse nos meses de setembro e outubro.

O Software Libre ten unha forte presencia neste avance de programación, con importantes novidades.

Así increméntanse o número de prazas para os cursos de LPIC1 e Seguridade baseada en software libre, duplicando tamén o número de horas neste último e finalmente incorpóranse cursos oficias sobre MongoDB.

Administración e desenvolvemento de bases de datos MongoDB

Como novidade, o CNTG incorpora á súa grella formativa cursos oficiais de MongoDB, base de datos orientada a dar resposta ao tratamento de datos estruturados e non estruturadas e cunha estreita relación co concepto de Big Data.

Ofertaranse un total de 40 prazas en dúas edicións de “Administración e desenvolvemento de bases de datos MongoDB”, e os/as asistentes poderán realizar de balde dous exames de certificación: MongoDB certified DBA associate e MongoDB certified developer.

Aberto o prazo para enviar propostas para as XIII Xornadas Libres de GPUL

Logo de GpulA XIII edición das Xornadas Libres de GPUL comezan xa a quecer motores un ano máis. Así, a semana pasada a organización abría o prazo para a remisión de propostas de participación nestas senlleiras xornadas de fomento da cultura libre en xeral aínda que cun maior énfase no Software e o Hardware Libre.

Para os que aínda non as coñezan, estas xornadas caracterízanse por contar cunha serie de charlas, obradoiros e concursos con contidos do máis heteroxéneo, pero sempre xirando arredor do mundo do software e o hardware libre, os estándares abertos, as licenzas, e a cultura libre en xeral.

Este ano as XIII Xornadas Libres de GPUL celebraranse os días 8, 9 e 10 de outubro na Facultade de Informática da UDC. Pódense enviar propostas ata o día 8 de setembro.

MiniNo, a alternativa galega a Windows XP, prepara xa súa nova versión

Orla dos desenvolvedores asistentes á IV MiniNo DevconfOs desenvolvedores de MiniNo volveron manter esta pasado fin de semana a súa reunión anual, a IV MiniNo Devconf. Nesta reunión, entre outras cousas, ultimaron os detalles que faltaban por pulir e publicaron a MiniNo Ártabros 2.1 RC, o que quere dicir que se non se detectan fallos podería converterse na versión definitiva, que agardan poder publicar non máis alá de finais de Agosto ou primeira semana de Setembro.

Para quen aínda non a coñeza, GALPon MiniNo é unha distribución GNU/Linux, baseada en Debian, que ten por obxectivo dar solución a computadores moi antigos e con moi poucos recursos. Naceu no ano 2008, e a última versión a 2.0 foi publicada hai case dous anos, e conta xa con máis de 14.000 descargas, sendo case 6.000 correspondentes ao primeiro semestre de 2014.

Así pois, case dous anos despois da publicación da versión 2.0, o equipo considerou que era un bo momento de revisar e modernizar esta distribución que está espertando tamén moito interese como alternativa para migrar equipos antigos que ata o de agora tiñan Windows XP, que xa non conta con soporte.

Pax. 11 de 59« Primeiro...910111213...203040...Último »

Pin It on Pinterest