Actualidade

A plataforma Mature Project, un proxecto que naceu en outubro de 2008 coa finalidade de proporcionar aos empresarios diversas fórmulas que lles permitan poder manter nas súas empresas aos empregados de máis de 50 anos, estará operativa en 16 idiomas no primeiro trimestre do próximo ano. Así se decidiu na terceira reunión transnacional do proxecto Mature que se celebrou nas dependencias da Consellería de Traballo e Benestar en San Lázaro.

Este proxecto, que está previsto que remate no ano 2010, artéllase arredor dunha plataforma e-learning de código aberto e unha serie de ferramentas de recollida de materiais de formación para facilitar a introdución de políticas e prácticas de contratación de persoal de diversas idades.

Segundo acaba de publicar o Observatorio Galego da Sociedade da Información (OGSI): “un 10,1% das empresas de máis de 10 empregados usa o sistema operativo LINUX, fronte ao 8,9% estatal. O crecemento interanual en Galicia foi do 23,2%.”

Estas conclusións foron sacadas analizando os datos proporcionados polo Instituto nacional de Estatística (INE) sobre o uso das TIC e do comercio electrónico nas empresas durante o curso 2008/2009.

Ademais, destes datos tamén conclúe que: “algo máis da metade das empresas galegas deste segmento con conexión a internet emprega a sinatura dixital, dous puntos por riba da media estatal. O 93,5% delas úsana para relacionarse coas administracións públicas, e máis do 16% para relacionarse cos clientes e provedores…

O Centro de Novas Tecnoloxías de Galicia da Consellería de Traballo e Benestar inicia o vindeiro mes de outubro a súa programación formativa, que se prolongará ata xuño de 2010. A oferta inclúe un total de 46 cursos técnicos e especializados, entre os que se contarán varios programas sobre aplicativos de software libre.

Todos estes cursos impartiranse en xornadas de mañá ou tarde. Por primeira vez, o alumnado terá a posibilidade de elixir un horario intensivo, os venres ou sábados pola mañá. Tamén como novidade, a meirande parte dos cursos incluirán un foro de consulta integrado no portal web do Centro de Novas Tecnoloxías de Galicia, http://cntg.xunta.es.

Os cursos específicos en materia de software libre, como nos fixo chegar Brenlla, son:

• Administración avanzada de sistemas operativos Linux (certificación LPIC 2), 64 hs, obtense certificación, data 26/10/2009, imparte IBM

• Administración de sistemas operativos Linux (certificación LPIC 1), 80 hs, obtense certificación, data 27/10/2009, IBM

• Administración de S.O. Red Hat Linux – Nivel Certified Engineer. Certificación RHCT RHCE, 64 hs, obtense certificación, data 25/01/2010, Red Hat

• Administración de S.O. Red Hat Linux – Nivel Certified Engineer. Certificación RHCT RHCE, 80 hs, obtense certificación, data 26/01/2010, Red Hat

• Administración de bases de datos MySQL, 48 hs, obtense certificación, data 01/03/2010, MySQL

• Desenvolvemento de aplicativos WEB con PHP e MySQL sobre Apache, 80 hs, obtense certificación, data 06/04/2010, MySQL

• Implementación de VoIP con Asterisk, 36 hs, sen certificación, data 03/05/2010, ASTERISK

A Linux Foundation, a entidade sen ánimo de lucro que apoia o desenvolvemento do kernel de Linux, retomou onte a vella iniciativa de LinuxFud.org de 1999 –da que xa dera conta Mancomún– de adquirir unha tarxeta de crédito coa que se facía unha doazón cada vez que se lle daba un uso. Agora, a Fundación anuncia unha nova tarxeta de afinidade Visa Platinum -tarxetas de crédito decoradas cun determinado logotipo- que, baixo o nome de Linux Credit Card, se ofrecerá á xente que queira contribuír a promover o sistema operativo a través das iniciativas da organización.

A Linux Foundation asociouse con CardPartner para ofrecer esta tarxeta de crédito a través do banco UMB. A organización recibirá USD$50 por cada tarxeta activa, así como unha porcentaxe de cada compra realizada coa tarxeta de crédito.

O organismo sen ánimo de lucro asegurou que o 100% dos ingresos da tarxeta Visa do programa destinarase directamente a patrocinar encontros da comunidade e bolsas de viaxe para os desenvolvedores que axuden a acelerar a innovación Linux.

O Instituto Tecnológico de Galicia (ITG) anunciou na súa web que durante este mes está levando a cabo diferentes actividades de implantación do seu software aberto de ERP: Hgpyme.

Así, na entidade BIC Galicia (Centro Europeo de Empresas e Innovación de Galicia), están a piques de rematar a implantación despois de 6 meses de traballo. A estrutura modular do software, o código aberto e a súa accesibilidade a través da Internet desde calquera dispositivo móvil foron algúns dos factores máis determinantes á hora de elexir a solución ERP HGPyme para o proxecto, segundo comentan na propia web.

As outras dúas empresas nas que se está implantando son:

• Electrónica del Noroeste onde o traballo realizado polo ITG está nunha primeira fase centrada na personalización do módulo de xestión de proxectos e a interactividade web con clientes e provedores.
• Construcciones Vixoy, empresa construtora especializada en edificación, obra civil e urbanismo que elixiu HGPyme para controlar de forma rápida e eficiente os custos de todas e cada unha das súas obras.

Outros dos aplicativos de software libre que implanta o ITG e que poden integrarse co seu software de xestión son:

• Eclipse Birt, ferramenta de cadro de mandos e xestor de informes avanzados
• Factura electrónica

Nun acto celebrado no Clube Internacional de Prensa de Santiago, e no que interviu o secretario xeral de Política Lingüística, Anxo Lorenzo, o Centro Ramón Piñeiro para a investigación en humanidades presentou a nova versión do CORGA, o Corpus de Referencia do Galego Actual, alén de novas ferramentas web que permiten aproveitar estes desenvolvementos.

O CORGA consiste nun corpus de documentos en formato electrónico no que están representados os diferentes tipos de textos (xornalísticos, divulgativos, literarios, etc.) da lingua galega actual, desde 1975 ata a actualidade. Entre os principais avances que incorpora esta última versión do CORGA atópase o desenvolvemento do Etiquetador / Lematizador do Galego Actual (XIADA), que engade información gramatical sobre as palabras e un sistema de busca por palabra moito máis avanzada. Os outros dous recursos lingüísticos que se proporcionan son a lista completa de formas ortográficas diferentes (386.000) presentes no CORGA, xunto coa súa frecuencia de ocorrencias e unha ferramenta que achega diversa información sobre cada palabra.

A lista completa das formas ortográficas pode obterse cunha licenza libre, a LGPL e, asemade, as buscas realizadas a través do CORGA tamén son libres, se ben e necesario rexistrarse (de forma totalmente gratuíta) para obter un usuario e contrasinal.

Ademais, tamén está previsto que en setembro se libere o corpus etiquetado, que distingue case 260 mil formas gráficas e máis de 300 mil elementos gramaticais…

O software, chamado GONG, foi lanzado polo CENATIC en febreiro de 2008 e presentado posteriormente na OSWC de Málaga ’08, no mes de outubro.

Esta primeira versión é a 0.93 e atópase dispoñíbel en español, catalán e inglés. Ademais inclúe un novo instalador que simplifica bastante o proceso de instalación.

Todas aquelas persoas que estean interesadas, poden descargar GONG desde o repositorio do proxecto na forxa do CENATIC: http://forja.cenatic.es/news/?group_id=76 ou desde a seguinte ligazón.

Os elementos de xestión principal da ferramenta son os proxectos, socios, recursos humanos, provedores, contactos, Administración financeira e cadro de ordes…

Visto na "Gaceta Tecnológica":
"Todos os traballadores do concello de Lalín pasarán pola sala de informática do auditorio onde recibirán un curso de 20 horas de formación en OpenOffice.org, para adaptárense ás novas ferramentas informáticas. Isto é o primeiro paso para levar a cabo, o proxecto anunciado polo alcalde José Crespo o pasado mes de abril, de migrar os equipos de consistorio paulatinamente a programas de software libre, coa finalidade de conseguirlle un aforro importante ás arcas municipais polo custo de licenzas que poida repercutir no propio concello.

Este proceso de renovación informática está a ser realizado pola empresa Ofitiendas e a súa aposta por programas de filosofía de código aberto, segundo Crespo, vén avalada pola opinión dos técnicos que traballan no proceso e que apoian a súa calidade.

A iniciativa enmarcada no programa "Eu Conecto" promoverá o uso de aplicativos libres, entre outras actividades

A Concellería de Servizos Xerais de Lugo organiza mañá, día 14 de maio, o programa de actividades previsto na cidade con motivo da celebración do Día Mundial de Internet o vindeiro 17 de maio -coincidente por outra banda, coa celebración do Día das Letras Galegas na nosa terra.

Mancomún colaborará coa iniciativa local achegando o seu completo sistema operativo libre, Galinux, que será preinstalado en todos os equipos habilitados para a realización dos obradoiros. Asemade, distribuiranse gratuitamente exemplares do Galinux entre todos os participantes na xornada.

A cita terá lugar na planta baixa da Praza de Abastos de Lugo entre as dez da mañá e as oito do serán, horas nas que se sucederán os obradoiros previstos: Facebook, You Tube, Skype e Google. Ademais, haberá actividades paralelas como a exposición A Historia de Internet, que constará de 16 paneis con imaxes e textos explicativos, desde os anos 50 ata a actualidade, narrando a historia da rede de redes a nivel mundial. Por outra banda, haberá un espazo de ocio con dúas zonas de xogo e todos os participantes entrarán no sorteo dun computador.

O pasado día 25 de abril, a Sociedade Galega de Ornitoloxía  presentou o Noticiario Ornitoxeográfico Galego, un Sistema de Información Xeográfica (SIX) para o avistamento de aves, desenvolvido pola empresa galega Sixtema. A principal novidade que achega esta ferramenta é a aplicación dos SIX ao campo da ornitoloxía co valor engadido de facelo empregando software libre adaptado por unha empresa galega.

No acto de presentación, o Conselleiro de Medio Ambiente, Territorio e Infraestruturas, Agustín Hernández, destacou o interese xeral deste tipo de ferramentas, que permiten achegarse a un elevado número de usuarios, e serven para difundir a riqueza ambiental e de biodiversidade coa que conta a comunidade galega.