O martes 19 de novembro ás 18:30 na Facultade de Informática terá lugar unha nova sesión de GPUL School na que a profesora Laura M. Castro falará do sistema de edición de documentos LaTeX dende cero e proporcionará os coñecementos necesarios para chegar ate o infinito.

A Asociación Universitaria GPUL (Grupos de Programadores e Usuarios de Linux) continúa coa iniciativa GPUL School mediante a que queren achegar á sociedade ás tecnoloxías libres co foco posto tanto na comunidade universitaria máis novata coma nas persoas que pretendan iniciarse no mundo libre dende cero.

Introducción LaTeX GPUL School

Para máis información sobre o evento e a inscrición ao mesmo pódese acceder á páxina de meetup do mesmo.

GPUL School

Esta iniciativa de GPUL naceu para cubrir a demanda existente fundamentalmente por parte de estudantes de informática de formación en tecnoloxías libres concretas sen necesidade de coñecementos previos, por iso esta iniciativa pese a centrarse na comunidade universitaria tamén se abre para todas a persoas con ganas de aprender.

GPUL School ten xa dende hai tempo varias sesións programadas que terán lugar proximamente sobre diversas temáticas como IoT, Raspberry Pi ou a privacidade.

LaTeX

O proxecto LaTeX é un sistema de edición de documentos de alta calidade orientado ao mundo técnico e científico, onde é o estándar de facto.

Os documentos en LaTeX non se editan coma nas suites ofimáticas como LibreOffice senón que se especifican dun xeito parecido ao HTML, XML ou Markdown e a fortaleza deste sistema está en que permite centrarse no contido dos documentos sabendo que o resultado final terá unha calidade alta.

Pin It on Pinterest

Share This