NVIDIA publicou un driver de código aberto oficial para o kernel de Linux (ata o de agora, ofrecera o soporte para Linux a través dun driver privativo). O driver R515 publícase baixo unha licenza dual (GPLv2 estándar e MIT), para evitar calquera tipo de conflito coa liña oficial do kernel.
O driver limítase ás últimas xeracións de tarxetas gráficas de NVIDIA: Turing e Ampere (GTX 16, RTX 20 e RTX 30), polo que a maioría dos usuarios non se verán beneficiados, de momento.
O soporte de OpenGL, Vulkan, OpenCL e CUDA seguirá sendo privativo. Sen soporte de OpenGL e Vulkan é imposible executar a inmensa maioría dos videoxogos actuais, tamén supón unha limitación á hora de ter unha experiencia plena con escritorios GNOME ou KDE Plasma. OpenCL e CUDA están orientadas a sectores profesionais nos que se traballa con solucións como Blender.
NVIDIA dixo que os módulos para o kernel son opcionais e están listos para produción nas GPU empregadas en centros de datos, mentres que os considera en fase alfa para os modelos de gráficas GeForce e as orientadas a estacións de traballo. NVIDIA dá un primer paso cara a liberación do seu código, veremos onde chega.
