A empresa Purism acaba de actualizar a súa computadora mini chamada “Librem Mini” e que sacou á luz e marzo deste ano, como se contou nesta nova. Esta versión 2 non presenta un gran cambio para o modelo, o máis destacable é a actualización do procesador a un da nova xeración de Intel.

Polo tanto, esta nova versión mantén toda a esencia da empresa Purism, que ten un compromiso coa liberdade, a privacidade e a seguridade, polo que emprega compoñentes libres como a escolla dos firmwares que se poden configurar nos equipos, unha característica a destacar fronte a outros fabricantes que non permiten escoller este compoñente esencial das computadoras.

O novo modelo xa se atopa á venda na páxina web de Purism sobre o modelo e conta coas seguintes características:

  • Procesador: Intel Core i7-10510U (Comet Lake) de 4 núcleos, 8 fíos de execución e ata 4.9GHz de frecuencia.
  • Gráficos: Intel UHD Graphics 620
  • Memoria: DDR4-2400, 2 ocos SO-DIMM e dende 8GB ata 64GB
  • Almacenamento: Soporta un disco SATA III e outro M.2, SATA III ou NVMe
  • Conexións de vídeo: HDMI 2.0 e DisplayPort 1.2 ambos 4K e a 60Hz
  • Conexións USB: 4 USB 3.0, 2 USB 2.0 e outro USB C 3.1
  • Conexión de son: entrada e saída combinadas nun AudioJack de 3.5mm
  • Rede: conector RJ45 con Gigabit Ethernet e opcionalmente tamén se pode instalar unha placa de rede sen fíos Atheros ATH9k coa tecnoloxía 802.11n e dobre banda. Bluetooth 4.0 Ar3k tamén opcional
  • Enerxía: 1 botón de acendido e conector de corrente de DC-IN
  • Dimensións: 12.8 cm x 12.8 cm x 3.8 cm
  • Peso: 1KG
  • Firmware: coreboot e SeaBIOS ou PureBoot
  • Sistema Operativo: Distribución de GNU/Linux PureOS
  • Prezo: 699 $

Pin It on Pinterest

Share This