O proxecto KDE Edutainment Project ten como meta desenvolver Software Libre para a educación dentro do contorno de escritorio KDE. Estes programas van dirixidos ás escolas, aos pais e aos alumnos e están dispoñibles en multitude de idiomas. As aplicacións están deseñadas para ser divertidas, coloristas e atractivas e deben ser o suficientemente sinxelas para que os rapaces as usen sen supervisión dos seus pais.
As aplicacións van dirixidas a rapaces de 3 a 18 anos en materias como matemáticas, lingua ou ciencias tentando que os estudantes aprendan á vez que se divirten. O proxecto está aberto á participación de desenvolvedores, tradutores, artistas, músicos e todo aquel que queira participar.
