O Conselleiro de Innovación e Industria, Fernando Blanco, presentou esta mañá en Santiago as novas aplicacións informáticas en software libre que se poderán descargar de balde dende o noso portal. En concreto, Fernando Blanco presentou a tradución ao galego do paquete ofimático Open Office 2.0, así como dun corrector ortográfico baseado na normativa oficial da lingua galega actualmente vixente. …
Este paquete pódese actualizar a través da propia rede e agora preséntase por primeira vez traducido ao galego. Estará dispoñible, de maneira gratuíta por suposto, para todos os usuarios. Asemade, na tarde de mañá repartiranse os primeiros 500 Cd’s con Open Office 2.0 en galego na Alameda de Santiago de Compostela, nos cibercamións do Arredemo Lab de A Cultura Circula.
O conselleiro de Innovación e Industria, asinou tamén un convenio de colaboración co presidente da Real Academia Galega, Xosé Ramón Barreiro Fernández, para a presenza na rede de materiais lingüísticos de grande utilidade e alta caliadade, para o uso xeneralizado dos galegos e galegas.
No mesmo acto asinouse outro convenio coa Asociación de Enxeñeiros de Telecomunicacións de Galicia, representada polo seu presidente, Ramón Bermúdez de Castro Olavide, para o seguimento da extensión da banda larga no noso país.
Fonte: Xunta de Galicia
