A FSFE publica unha carta aberta, cofirmada por 38 organizacións e empresas, para pedir aos lexisladores da UE o dereito para instalar calquera software en calquera dispositivo, incluíndo o acceso total ao hardware. Estes dereitos favorecen a reutilización e a lonxevidade dos nosos dispositivos. A alianza está composta por entidades dos sectores ambiental, económico e tecnolóxico.

A Unión Europea está a piques de redefinir os criterios de ecodiseño dos produtos en varias propostas lexislativas, como a Iniciativa de Produtos Sostibles, a Iniciativa de Electrónica Circular e o Dereito de Reparación. Estas propostas teñen como obxectivo ampliar o tempo de uso do hardware e facilitar o uso circular dos dispositivos electrónicos. A normativa actual data de 2009 e non inclúe ningún criterio sobre o deseño e a licenza do software como factor importante para a sustentabilidade dos produtos electrónicos. O software inflúe directamente no tempo que os consumidores poden seguir utilizando os seus dispositivos.

Hoxe en día, os usuarios que queren seguir utilizando os seus dispositivos durante máis tempo, ou reutilizar o seu hardware de forma creativa, enfróntanse a unha ampla gama de barreiras de software: desde a obsolescencia ata o fin inesperado do soporte, pasando pola serialización das pezas de reposto ou os cargadores de arranque bloqueados. Na práctica, estas restricións artificiais ao uso e a reutilización do hardware son impostas en última instancia polo software. Nin os consumidores nin os servizos profesionais de terceiros poden superalas, a miúdo simplemente debido á escuridade dos modelos de licenza do software propietario. As licenzas de Software Libre resolven moitos destes problemas e desta maneira convértense en cruciais para un deseño ecolóxico e a sustentabilidade do hardware; este é a mensaxe central dunha Carta Aberta publicada pola Fundación do Software Libre de Europa e cofirmada por 37 organizacións e empresas europeas.

Entre os asinantes iniciais atópanse grandes gremios da reparación como a Campaña Europea polo Dereito á Reparación, a Mesa Redonda da Reparación e a Iniciativa Netzwerk Reparatur, que en conxunto representan centos de iniciativas e asociacións do sector europeo da reparación. Xunto con iFixit, Fairphone, Germanwatch, Open source Business Alliance, Wikimedie DE, Digitalcourage, European Dixital Rights Initiative, e outras, forman unha alianza de 38 organizacións, que piden aos lexisladores europeos unha economía dixital máis sostible dando aos usuarios o dereito para elixir libremente sistemas operativos, software e servizos.

A carta divide este dereito en catro esixencias fundamentais:
– Dereito universal a instalar calquera software en calquera dispositivo
Os usuarios deben ter o dereito universal de instalar e desenvolver calquera sistema operativo e software que desexen en calquera dispositivo. Non deben permitirse obstáculos legais, técnicos ou doutro tipo para reutilizar estes dispositivos con calquera fin.

– Libre elección de provedores de servizos en liña
O uso dun determinado hardware non debe ditar que servizos en liña utilizar. A obrigación de conectar os servizos en liña a través de estándares abertos debe permitir aos usuarios elixir servizos de diversos fabricantes, incluídos os servizos autoaloxados ou os aloxados por calquera terceiro.

– Dispositivos interoperables e compatibles
O uso dun determinado hardware non debe ditar que outro hardware hai que comprar para manter eses dispositivos conectados. Os fabricantes deben proporcionar todos os datos necesarios para o funcionamento dun dispositivo en formato de estándares abertos, permitindo a interoperabilidade dos dispositivos. Non debe permitirse a incompatibilidade artificial dos dispositivos.

– Publicación do código fonte dos controladores, ferramentas e interfaces
Os fabricantes deben permitir aos usuarios reutilizar, substituír ou reparar calquera parte dun dispositivo. Isto só é posible se os usuarios poden acceder e reutilizar o código fonte de todos os controladores, ferramentas e interfaces necesarios para o funcionamento do dispositivo e os seus compoñentes. Isto significa que o código fonte das ferramentas, controladores e interfaces de cada peza de hardware dun dispositivo debe publicarse baixo unha licenza de Software Libre.

A FSFE e 38 organizacións e empresas europeas subliñan estas esixencias como necesarias para o uso sostible e a reutilización do noso hardware. Dar aos usuarios o dereito para elixir libremente os sistemas operativos, o software e os servizos permitiralles utilizar e reutilizar os seus dispositivos durante máis tempo.

Máis información

Pin It on Pinterest

Share This