O departamento de ciencia, investigación e arte do goberno do estado de Baden-Württemberg, en Alemaña, anunciou en xaneiro a creación dun laboratorio de software libre cunha dotación económica de 125.000 euros.
O novo laboratorio está emprazado no instituto de tecnoloxía de Karsruher e non só ten como misión formar aos estudantes, senón que tamén se prevé a formación de profesores de secundaria nesta materia. O laboratorio servirá para que os estudantes se familiaricen co software libre, pero non só con ferramentas libres, senón co proceso do desenvolvemento e os fundamentos legais do mesmo traballando en primeira persoa en proxectos libres. Así mesmo, neste laboratorio tamén se desenvolverán materiais didácticos para o profesorado de secundaria incluíndo ferramentas de software libre a medida para o seu uso nas aulas.
Os responsábeis do instituto tecnolóxico destacan que o software libre se esta volvendo cada vez máis importante debido a que, entre outras cousas, os proxectos libres son capaces de involucrar a voluntarios, compañías privadas e institucións públicas. Outro factor destacado é que ao ter acceso ao código fonte dos programas pódense realizar dun xeito máis eficaz tarefas de auditoría.
Fonte: Joinup e KIT (Karsruher Institut für Technologie)
Imaxe de Carsten Naber (Wikipedia)
