Mobilizon é unha alternativa libre para os eventos e grupos de Facebook. Trátase dun software que se pode instalar nun servidor para crear múltiples plataformas de eventos e grupos, chamadas instancias, que poden estar vinculadas entre si dentro dunha federación.
A versión anterior de Mobilizon trouxo varias actualizacións (axuste das zonas horarias, melloras na visualización dos idiomas…), novas funcionalidades (posibilidade de seguir as actividades públicas dun grupo sen ter que unirse, exportación da lista de asistentes ao meu evento, posibilidade de buscar entre os eventos pasados…) e algúns pequenos retoques (deseño dos correos electrónicos, tarxetas de presentación dos eventos ou da aparencia dos grupos…).
Mobilizon – Ilustración de David Revoy – Licencia : CC-BY 4.0
A versión v3 chega tamén con moitas novidades
Mobilizon Search Index, un motor de procura global para explorar eventos e grupos. Esta ferramenta permite buscar e explorar Mobilizon de diferentes maneiras. Os resultados serán os mesmos para todos, baseados unicamente na túa procura (e no idioma do teu navegador), e en absoluto clasificados segundo un perfil.
Os resultados preséntanse de forma clara e detallada, para evitar a guerra de atención que leva ás miniaturas clickbait e aos títulos en maiúsculas. Os filtros de procura permítenche ordenar os resultados e mostrar os que realmente queres.
Visualización de resultados en modo mapa
Non todas as instancias de Mobilizon estarán referenciadas en Mobilizon Search Index. Este motor de procura basearase na lista de instancias en https://instances.joinmobilizon.org. Ata a data, esta lista consta de 83 instancias.
Outras novidades
Esta V3 ofrece un novo deseño da páxina de inicio e da páxina de resultados de procura:
– a barra de procura é agora máis visible e pódese precisar unha localización
– móstranse 3 fichas de categorías (destácanse as que teñen máis eventos)
– 2 seccións destacan os eventos próximos e os grupos populares próximos á túa localización (se utilizas o botón xeolocalizarme ou se precisas nas preferencias da túa conta unha cidade ou rexión)
– unha nova sección dedicada aos próximos eventos en liña
– unha sección para os últimos eventos publicados na súa instancia e a súa federación
Os administradores agora teñen a posibilidade de utilizar ferramentas de métrica (Matomo e Plausible) na súa instancia de Mobilizon que lles permiten ter datos adicionais (por exemplo, o número de vistas dunha páxina ou o número de vistas dun evento) ademais das estatísticas que proporciona o propio software.
