Publicacións dixitais profesionais: deseño, autoedición, maquetación e diagramación con Scribus

Facer publicacións dixitais profesionais hoxe en día, é unha tarefa sinxela sempre que se conte cunha ferramenta de autoedición axeitada.

Neste curso aprenderemos a usar Scribus, un software específico para a autoedición e maquetación que facilita e automatiza a composición, deseño e diagramación de páxinas. Scribus fai posible a creación dunha gran variedade de documentos e formularios, así como a impresión en diferentes formatos, tanto para a publicación a gran escala, como para a distribución a menor escala.
Scribus é unha aplicación multiplataforma de fontes abertas, compatible con Linux, Mac OS e Windows.

Neste curso abordarase unha introdución ao uso de Scribus, pasando pola creación de documentos sinxelos ata maquetacións e configuracións avanzadas, xestión da cor, impresión e exportación.

O material está dispoñible nos seguintes formatos:

• Pdf, facilita a visualización en multitude de dispositivos diferentes (ordenador, smartphone, tablet, libro electrónico).
• Elp, formato para empregar a ferramenta de edición de contidos exeLearning o que permite que calquera poida modificar ou completar facilmente o curso para adaptalo ás súas necesidades sempre que cumpra adecuadamente coa licenza.
• HTML, facilita a visualización a través de calquera navegador.
• SCORM, conxunto de obxectos de aprendizaxe empaquetados e estruturados como material web de forma pedagóxica baixo un estándar libre que permite importar, reutilizar e compartir contidos.

Este curso está tamén dispoñible para a súa visualización e seguimento, con acceso de conta de convidado, na Aula virtual da Oficina de Software Libre do CIXUG.

Licenza

Este material publícase baixo licenza Creative Commons Recoñecemento-Compartir igual 4.0.
Isto permite que os contidos poidan ser empregados pola cidadanía para calquera uso, tanto a adquisición de coñecementos sobre esta ferramenta de deseño gráfico con licenza libre como a realización de cursos de formación con este material, sempre que se mencione a autoría da obra orixinal e se comparta coa mesma licenza.

Autoría

A posta en marcha deste curso encádrase dentro das actividades que o Consorcio para o Desenvolvemento de Aplicacións Informáticas de Xestión Universitaria (CIXUG) está a desenvolver no eido do fomento do uso e divulgación do Software Libre no ámbito universitario en Galicia, apoiando a concreción das accións definidas dentro da Axenda Dixital de Galicia “Plan de acción 2018 en materia de Software Libre“, e contando co cofinanciamento da Axencia para a Modernización Tecnolóxica de Galicia (AMTEGA).