Novas
Dentro da iniciativa SmartPeme da Deputación de Pontevedra terán lugar varias sesións formativas sobre software libre en distintos puntos da provincia: En Barro 5 de febreiro haberá a cuarta sesión do obradoiro de programación con Arduino, en Cambados o 7 de febreiro e en Ponteareas o 12 haberá un obradoiro sobre a creación dunha páxina profesional con WordPress, tamén sobre WordPress, terá lugar en Cambados un obradoiro sobre plugins que axudarán a mellorar a web e por último, o 19 de febreiro en O Porriño terá lugar un evento sobre a solución para venta en liña Woocommerce.
O CDTIC, déixanos dúas novas. A primeira é sobre o CDTIC Virtual da Amtega ampliou a oferta de aplicacións libres con FacturaScripts, unha solución para a xestión empresarial, que queda a disposición de todas aquelas persoas que queira probalo. A segunda é que organizan unha sesión demostradora do software ERP libre Odoo o 15 de febreiro.
A primeira fin de semana de febreiro terá lugar a FOSDEM (Free and Open Source Developers European Meeting) que reunirá en Bruxelas a máis de 8000 desenvolvedores e usuarios de software libre con conferencias retransmitidas online.
Proxecto destacado
Sogo é unha solución de colaboración e produtividade liberada baixo a GPLv2. Esta plataforma conta con solución de correo electrónico, calendario, axenda, contactos, servizo de directorio, tendo unha longa lista de funcionalidades. Trátase dunha solución desenvolvida principalmente na linguaxe Objective-C que soporta diversos estándares como son CalDAV, CardDAV, iCalendar e intégrase perfectamente con calquera plataformas que soporten OpenLDAP, Active Directory, IMAP e SMTP.
O principal desenvolvedor da solución é a empresa de consultoría e integración de software libre canadense Inverse, que tamén ofrece diversos paquetes de soporte profesional e servizos de integración que complementarían ao soporte gratuíto ofrecido pola comunidade, como é tradicional no software comunitario. A solución completa conta tanto con software de servidor como con clientes para diversas plataformas como poden ser Android, Windows Phone, IOS, Mozilla Thunderbird, Microsoft Outlook…
