Existe moitos casos de éxito tanto de Nextcloud coma de Collabora Online en diversos ámbitos e sectores. O que ocupa o boletín deste mes é o do Departamento francés Ille et Vilaine, que grazas á entidade SIB implantou a solución conxunta composta por Nexcloud e Collabora Online en entidades educativas.

Neste proxecto composto por Nextcloud e Collabora Online, levaron a cabo un despregue paso a paso. A solución actualmente está a ser usada por arredor de 12.000 usuarios, entre profesorado e estudantado, en 21 escolas da rexión. Mais o obxectivo é chegar a ter presenza en 57 escolas e contar con 2.500 profesores e 33.000 estudantes que usarían o sistema nun futuro próximo.

A infraestrutura, segundo traballadores da SIB, pode escalar segundo as necesidades das escolas controlando o investimento necesario e medrando a medida que sexa necesario. Grazas á solución implantada, os estudantes poden traballar dende as súas casas e os profesores poden acceder aos deberes e traballos dos alumnos con garantías de interoperabilidade e dende calquera parte e computadora.

Nextcloud é unha solución libre coa que se poden poñer en funcionamento unha plataforma de produtividade e colaboración que naceu dunha bifurcación de ownCloud. Trátase dunha solución centrada na privacidade, que garante a soberanía dos datos e é respectuosa coas leis de protección de datos, tanto a GDPR europea como a CCPA de California, polo que é unha solución válida tanto para empresas e administracións públicas como para uso doméstico e persoal.

Collabora Online é unha solución que complementa a Nextcloud, dotando a esta de xestión de documentos ofimáticos en liña, de xeito colaborativo, grazas á cal se poden editar documentos de texto, follas de cálculo ou deseños aloxados no Nextcloud directamente dende o navegador.

Ademais de ampliar o funcionamento coa aplicación Collabora Online, tamén se poden instalar outras aplicacións en Nextcloud, extendendo así as características de base da solución, que de por si trae incorporada a aplicación como sincroniar e compartir ficheiros a través da rede, xestionar contactos e calendarios, ou mesmo participar en videoconferencias

Tanto Nextcloud coma Collabora Online poden despregarse en infraestrutura propia ou tamén usar servizos ofrecidos por terceiros.